Арт-терапия – студенттердің әлеуетін ашудың жаңа тәсілі

Әл-Фараби атындағы Қазақ ұлттық университетінің Рек­реа­циялық география және туризм кафе­дра­сының студенттері оқу жылының басынан бері ерекше жобаны жүзеге асырып келеді. Ол – арт-терапия сабақтарын ұйымдас­ты­ру. Бұл әдіс сту­дент­тердің ішкі әлеуетін ашуға, шығармашылық ойлауын дамытуға және оқу материал­да­рын жеңіл қабылдауға көмек береді.

Арт-терапия сабақтары түр­лі форматта өтеді: сурет салу, коллаж құрастыру, құм те­рапиясы, музыкалық бей­не­леу, тіпті шағын қойылымдар да қолданылады. Мұндай са­бақ­тар студенттердің эмо­ция­лық тепе-теңдігін сақтауға, өз ойын еркін білдіруге және бір-бі­рімен тиімді қарым-қатынас орнатуға жол ашады.

Кафедра кураторларының айтуынша, арт-терапия инклю­зив­ті білім беру саясаты ая­сын­да ерекше маңызға ие. «Бұл әдіс – студенттермен жұ­мыс істеудің жаңа мәдениеті. Біз әрбір студенттің тұлғалық дамуына жағдай жасаймыз, әсіресе коммуникациясы тө­мен, өз ойын ашық жеткізуде қи­налатын жастарға ерекше көңіл бөлеміз. Арт-терапия олар­дың өз-өзіне сенімін арт­тырады», – дейді кафедраның аға кураторы Азамат Ал­мат­ұлы.

Кураторлар мен студенттер арасындағы тұрақты байланыс пен сенім – жобаның басты қа­ғидасы. Арнайы ұйым­дас­ты­рылған кездесулерде қаты­су­шылар оқу үдерісіндегі және жеке өмірдегі қиындықтарды ашық талқылап, бір-біріне қол­дау көрсетеді.

Университет саясатында ин­клюзивті білім беру ба­ғыт­тары мен психологиялық жай­лы­лық ерекше орын алады. Уни­верситет студенттердің тұл­ғалық және эмоционалдық да­муына зор көңіл бөліп, олар­ды рухани тұрғыда қолдайтын ор­та қалыптастыруда.

Бүгінде арт-терапия әдісі әлем­нің жетекші универ­си­теттерінде – Ұлыбританияның Манчестер университетінде, Финляндияның Хельсинки уни­верситетінде және Оңтүстік Кореяның Ёнсе уни­вер­си­те­тін­де кеңінен қолданылады. ҚазҰУ студенттері осы ха­лық­аралық тәжірибені ұлттық ерек­шелікке бейімдеп, шы­ғар­ма­шылық тәсілдермен ұштас­тыруда.

«Болашақ туризм және рек­реа­ция саласының мамандары адаммен жұмыс істеудің пси­хо­логиялық қырларын да терең түсінуі тиіс. Арт-терапия осы дағдыларды қалыптастырып, студенттердің кәсіби даяр­лығын арттырады», – дейді гео­графия және табиғатты пайдалану факультеті дека­ны­ның оқу әдістемелік және тәр­бие жұмысы жөніндегі орын­ба­сары Айман Шәкенқызы.

Кафедра ұжымы алдағы уақытта арт-терапия эле­мент­терін студенттік клубтар мен тәрбие жұмыстарына енгізуді жоспарлап отыр. Бұл бастама ҚазҰУ-дың «Адам мен қоғам үйлесімі» қағидатына негіз­дел­ген ғылыми-білім беру мо­делінің жарқын көрінісі болып табылады.

Руслан Байбөриев,

PhD, Рекреациялық география және туризм кафедрасының меңгерушісі