Заң ғылымының дамуына ҚазҰУ үлесі зор

Әл-Фараби атындағы Қазақ ұлттық универ­си­тетінің Фараби кітап­ха­насында Қазақстан Республикасы Консти­туциясының 30 жыл­ды­ғына арналған халық­аралық ғы­лы­ми-тәжірибелік конференция өтті.

Іс-шараның мақсаты – тәуел­сіз мемлекеттің Негізгі заңы ретінде Қазақстан Рес­пуб­ликасы Конституциясының 30 жылдық дамуын қоры­тын­ды­лау. Конференцияға жетекші отандық және шетелдік заң­гер-ғалымдар, мемлекеттік органдар мен халықаралық ұйым­дардың өкілдері, оқы­ту­шы-ғалымдар, сондай-ақ заң факультетінің докторанттары мен магистранттары қатысты.

Әл-Фараби атындағы ҚазҰУ-дың Басқарма Төра­ғасы – Ректор Жансейіт Түй­ме­баев қатысушыларға өз құттық­тау­ын жолдады.

«Тәуелсіз еліміздің тұрақ­ты­лығы мен орнықты дамуын қам­тамасыз етудегі негізгі заң­­ның стратегиялық рөлі ерек­­ше. Конс­титуцияға енгі­зіл­ген идея­лар Мемлекет басшысы айқын­даған «Күшті Президент – ық­палды Парламент – есеп бе­­­ретін Үкімет» тұжы­рым­да­ма­сында заңды жалғасын тапқан. Конституция идеяларын жүзе­ге асыруда Әл-Фараби атын­дағы ҚазҰУ ерекше рөл ат­қа­ра­ды», – делінген құттықтауда.

Пленарлық отырыста Әл-Фараби атындағы ҚазҰУ Ди­рек­торлар кеңесінің төрағасы, заң ғылымдарының докторы, профессор Қайрат Мәмидің құттықтау хаты оқылды. «Қа­зір­гі уақытта бүкіл әлемде тү­бе­гейлі өзгерістер орын алуда. Адам құқықтарын қамтамасыз ету мен қорғау, қоғамдық қа­ты­настар жүйесі мен мем­ле­кеттің тұтас жүйесі бірінші орынға шықты. Конституция – Қазақстанның тұрақты даму жүйесін құру мен адам және азамат құқықтарын қорғаудың не­гізі болып табылады», – деп атап өтті Қайрат Мәми.

Конференцияға қатысу­шы­лар ҚазҰУ-дың еліміздегі заң ғылымының дамуына және жо­ғары білікті заңгерлерді даяр­лауға ерекше үлес қосқа­нын айрықша атап өтті. Бұл оқу ор­нында Салық Зиманов, Мұрат Баймаханов, Сұлтан Сар­таев сынды көрнекті ға­лым-конс­ти­туционалистер ең­бек еткен. Олардың құқықтық мем­лекет, адам құқықтарының басым­ды­ғы, заң мен сот ал­дындағы теңдік, ұлттық мем­ле­кеттілікті нығайту идеялары 1995 жылғы Конституцияда көрініс тапты.

Жиын барысында сарап­шы­лардың мазмұнды баян­да­малары тыңдалды.

Бұдан әрі қатысушылар Конс­­титуцияның құқықтық мем­лекет, демократиялық инс­­титуттар мен азаматтық қоғамды қалыптастырудағы рөлін талдап, жаһандану және тұрақты даму жағдайындағы конституциялық құрылысты дамытудың заманауи сын-қа­терлері мен алдағы мақ­сат­тарды талқылады.

Гүл БАЯНДИНА