Қытайтану кафедрасында Қытайдағы ақпараттық технологиялардың дамуы тарихына (1970–1990 жж.) арналған ғылыми семинар өтті

Ағымдағы жылдың 18 қараша күні әл-Фараби атындағы Қазақ ұлттық университетінің Шығыстану факультеті, қытайтану кафедрасында «Қытайдағы ақпараттық технологиялардың даму эволюциясы және қалыптасуының алғышарттары: алғашқы зерттеулер мен мемлекеттік саясат (1970 – 1990 жылдары)» атты ғылыми семинар өткізілді. Семинардың бастамашысы және негізгі баяндамашысы – 2-курс докторанты Ұлжан Жұбаниязова.

Семинарға қытайтану кафедрасының оқытушылары - PhD Мадиев Д.А., PhD Керимбаев Е.А., PhD, қауымдастырылған профессор Дауен Д.Б., сондай-ақ шығыстану факультетінің магистранттары мен докторанттары қатысты.

Ұлжан Жұбаниязова өз зерттеу жұмысының нәтижелерін мультимедиялық презентация форматында ұсынып, Қытайдың ІТ саласының 1970–1990 жылдар аралығындағы қалыптасуы мен эволюциясына қатысты кең көлемді әдеби шолу жасады. Әдебиетке шолу отандық және шетелдік ғылыми зерттеулерді қамтыды.

Презентация барысында төмендегі негізгі бағыттар қарастырылды:

1. 1970-жылдардағы алғашқы ғылыми-зерттеу бастамалары.
Компьютерлік технологиялар саласындағы алғашқы жобалар, әскери-инженерлік бастамалар, ҚХР Ғылым академиясының (CAS) қызметі және алғашқы қытайлық дербес компьютерді жасау әрекеттері талқыланды.

2. Дэн Сяопин реформалары және «Төрт модернизация» бағдарламасы (1978).
Экономикалық және саяси реформалардың Қытайдың ғылыми-техникалық дамуына әсерін сипаттайтын қытай, ағылшын және орыс тілдеріндегі зерттеулер талданды.

3. 1980-жылдардағы ұлттық компьютерлік және электрондық өнеркәсіптің қалыптасуы.
Great Wall, Lenovo (Legend), CAS зертханаларының дамуы, интегралды схемалардың жасалуы, халықаралық серіктестіктер және технология трансфері туралы материалдар қарастырылды.

4. Қытайдың мемлекеттік бағдарламалары және IT саясаты.
863 бағдарламасы, Torch бағдарламасы, «Ашық есік» саясаты, технопарктердің пайда болуы және жоғары технологиялық аймақтардың құрылуы талданды.

5. IT-мамандарды даярлаудағы білім беру жүйесінің рөлі.
Цинхуа университеті, Пекин университеті және Қытай ғылым академиясындағы информатика мамандарын даярлау тәжірибесіне арналған зерттеулер қарастырылды.

Семинар соңында қатысушылар тақырып бойынша пікір алмасып, баяндамашыға сұрақтар қойды. Іс-шара нәтижесінде докторант Ұлжан Жұбаниязованың диссертациялық жұмысы аясындағы ғылыми семинардың ресми есебі мақұлданды.