Физика-техникалық факультетінде Science Club кездесуi өтті. ТДМ 4 және ТДМ 9

Әл-Фараби атындағы Қазақ ұлттық университетінің Физика-техникалық факультетінде Al-Farabi Kazakh National University SPE Student Chapter студенттік ұйымының ұйымдастыруымен кезекті Science Club отырысы өтті.

Іс-шара 21 қараша күні, 330-аудиторияда өтіп, ғылыми модельдеу мен инженерлік талдау әдістеріне қызығушылық танытқан студенттер мен жас зерттеушілердің басын қосты.

Негізгі баяндамашы – Назар Забара.
Баяндама тақырыбы: «Модельдеу және мультифизика: заманауи зерттеулер мен инженерияның негізі (COMSOL Multiphysics)».

Кездесу барысында қатысушылар COMSOL Multiphysics платформасының мүмкіндіктерімен танысты. Бұл кәсіби сандық модельдеу бағдарламасы физикалық процестерді есептеуге кеңінен қолданылады және жылу алмасу, электромагниттік өрістер, кванттық және оптикалық жүйелер, материалдар механикасы мен көпқабатты құрылымдарды модельдеу үшін тиімді құрал болып табылады.

Факультеттің студенттері мен зерттеушілері үшін COMSOL Multiphysics ерекше құнды, өйткені ол:

• қымбат жабдықты қажет етпей сандық эксперименттер жасауға;
• күрделі физикалық процестердің модельдерін сынауға;
• бірнеше физикалық құбылысты (мультифизиканы) бір жүйеде біріктіруге;
• өрістер мен жүйе параметрлерін көрнекі түрде бейнелеуге, нәтижені талдауды жеңілдетуге;
• ғылыми жарияланымдар мен зерттеу жобаларына қажетті деректерді дайындауға мүмкіндік береді.

Іс-шараның ТДМ-ға қосқан үлесі

ТДМ 4 — Сапалы білім беру

Science Club отырысы заманауи цифрлық құралдарды оқу процесіне енгізуге ықпал етіп, студенттердің ғылыми және инженерлік дағдыларын дамытуға мүмкіндік береді.

ТДМ 9 — Индустрия, инновациялар және инфрақұрылым

COMSOL Multiphysics-ті меңгеру өнеркәсіп, материалтану, энергетика және қолданбалы физика салаларында сұранысқа ие жоғары технологиялық модельдеу әдістерін игерген мамандарды даярлауға жәрдемдеседі.

Іс-шара ашық форматта өтіп, ғылыми клубтардың білім алмасу, өзара әрекеттесу және зерттеу құзыреттерін қалыптастырудағы маңыздылығын көрсетті.