Әл-Фараби атындағы ҚазҰУ-да ICESICS 2025 экологиялық тұрақтылық бойынша халықаралық конференция өтті

2025 жылғы 6–8 қазан аралығында әл-Фараби атындағы Қазақ ұлттық университетінде «Экологиялық тұрақтылық: инновациялар, сын-қатерлер және шешімдер» (ICESICS 2025) атты халықаралық ғылыми конференция өтті. Іс-шараға Қазақстан, Үндістан, Ресей, Өзбекстан, Мысыр, Бангладеш және БАӘ-ні қоса алғанда, әлемнің 15 елінен 150-ден астам ғалым, зерттеуші, оқытушы және сарапшы қатысты.

Конференция әл-Фараби атындағы ҚазҰУ мен Экологиялық тұрақтылық қоғамының (Society for Environmental Sustainability, Үндістан) бірлесуімен ұйымдастырылып, гибридті форматта өтті. Іс-шараның негізгі мақсаты экологиялық тұрақтылық, биотехнологиялар және жаһандық экологиялық сын-қатерлерге инновациялық шешімдер саласындағы халықаралық ғылыми ынтымақтастықты дамыту болды.

Пленарлық отырыс барысында университет басшылығы мен халықаралық ғылыми қауымдастық өкілдері құттықтау баяндамалар жасады. Қатысушыларға қоршаған ортаны қорғаудағы биотехнологиялық тәсілдер, орнықты ауыл шаруашылығы, табиғи ресурстарды басқару, биоремедиация және климаттың өзгеруіне бейімделу мәселелеріне арналған негізгі баяндамалар ұсынылды. Конференция аясында әл-Фараби атындағы ҚазҰУ мен Society for Environmental Sustainability (Үндістан) арасында ынтымақтастық туралы Меморандумға қол қойылды.

Бағдарлама экологиялық инновациялар, орнықты агроөнеркәсіп, биотехнологиялар, жасыл энергетика және климаттық зерттеулер бойынша тақырыптық секцияларды қамтыды. Агросекторда биотехнологияларды қолдану, биоалуантүрлілікті сақтау, су ресурстарын тазарту, қалдықтарды басқару және «жасыл» технологияларды дамыту мәселелеріне ерекше назар аударылды. Конференция жұмысына студенттер мен жас ғалымдар белсенді қатысып, өздерінің ғылыми зерттеулері мен постерлік баяндамаларын ұсынды.

Іс-шара шеңберінде заманауи аналитикалық және биотехнологиялық шешімдерді таныстырған серіктестер көрмесі, сондай-ақ қатысушылар мен демеушілерді марапаттау рәсімі өтті. Конференция мәдени бағдарлама және экскурсиялық іс-шаралармен аяқталды.

ICESICS 2025 конференциясы Тұрақты даму мақсаттарының (ТДМ) негізгі бағыттарын іске асыруға үлес қосты, соның ішінде:

ТДМ 2 – Аштықты жою. Орнықты ауыл шаруашылығы, биостимуляторлар, биотыңайтқыштар және өнімділікті арттырудың микробиологиялық әдістері бойынша зерттеулер азық-түлік қауіпсіздігін қамтамасыз етуге бағытталды.

ТДМ 3 – Салауатты өмір салты және әл-ауқат. Биоремедиация, экологиялық токсикология, су мен топырақты тазарту тақырыптарындағы баяндамалар ластаушы заттардың адам денсаулығына әсерін төмендетуге қосқан үлесті көрсетті.

ТДМ 6 – Таза су және санитария. Ағынды суларды тазарту технологиялары, микробиологиялық ремедиация және су ресурстарын сақтау мәселелері осы мақсатқа тікелей ықпал етті.

ТДМ 7 – Қолжетімді және таза энергия. Лигноцеллюлозалық қалдықтарды биоконверсиялау арқылы биоотын мен «жасыл» энергия өндірудің биотехнологиялық тәсілдері қарастырылды.

ТДМ 9 – Индустрияландыру, инновациялар және инфрақұрылым. Конференция индустриялық әріптестіктер (Labprom Expert, Elementum, Veld, Nobel Almaty) арқылы инновацияларды енгізу мен биотехнологиялық инфрақұрылымды дамыту үлгілерін көрсетті.

ТДМ 12 – Жауапты тұтыну және өндіріс. Циркулярлық экономика, қалдықтарды қайта өңдеу, биоыдырайтын материалдар алу және көміртек ізін азайту мәселелеріне ерекше назар аударылды.

ТДМ 13 – Климаттың өзгеруіне қарсы күрес. Климаттық өзгерістердің салдарын азайту, көміртек балансы және экожүйелік тәсілдерге арналған секциялар осы мақсатты қолдады.

ТДМ 14 және 15 – Теңіз және құрлық экожүйелерін сақтау. Биоалуантүрлілік, экотуризм, табиғи ресурстарды қорғау және деградацияға ұшыраған экожүйелерді қалпына келтіру мәселелері қарастырылды.

ТДМ 17 – Тұрақты даму жолындағы әріптестік. Әл-Фараби атындағы ҚазҰУ (Қазақстан) мен SES (Үндістан) арасындағы меморандумға қол қойылуы, 15 елдің қатысуы және академиялық-өндірістік байланыстар халықаралық ынтымақтастық пен жаһандық серіктестіктің маңызын айқындады.

ICESICS 2025 конференциясын өткізу халықаралық ғылыми ынтымақтастықты нығайтып, ҚазҰУ-дың өңірдегі орнықты және инновациялық зерттеулердің жетекші орталығы ретіндегі ұстанымын күшейтті.

#SDG #SustainableDevelopment #KazNU #SustainableKazN #SDG2 #ZeroHunger  #SDG15 #LifeonLand
#SDG1 #NoPoverty
#SDG3 #GoodHealth
#SDG4 #QualityEducation
#SDG5 #GenderEquality
#SDG6 #CleanWater
#SDG7 #AffordableEnergy
#SDG13 #ClimateAction