Тұрақты даму мақсаттары аясындағы этномәдени тәжірибе: Түркістанның сакралды кеңістігі және рухани мұрасы

Әл-Фараби атындағы Қазақ ұлттық университетінің Философия және саясаттану факультеті базасында, Дінтану және мәдениеттану кафедраларының, сондай-ақ Жалпы және қолданбалы психология кафедрасының қатысуымен, әл-Фараби атындағы ҚазҰУ мен Қасиетті Климент Охридский атындағы София университеті (Болгария) арасындағы екіжақты ынтымақтастық туралы келісім аясында ұйымдастырылған этномәдени практика 2025 жылғы 5 қыркүйекте өз жалғасын тапты.

Аталған күні этномәдени практика Тұрақты даму мақсаттарының 4-тармағы — сапалы білім беру, сондай-ақ Тұрақты даму мақсаттарының 17-тармағы — мақсаттарға қол жеткізу жолындағы серіктестік шеңберінде жүзеге асырылып, Қазақстанның рухани және сакралды орталықтарының бірі болып саналатын Түркістан облысы аумағында өтті. Бұл күн елдің сакралды географиясын, тарихи-діни мұрасын және рухани құндылықтардың ұлттық бірегейлік пен гуманитарлық дүниетанымды қалыптастырудағы рөлін зерделеуге арналды.

Арыстан баб кесенесіне, Отырар қалашығына және Түркістан қаласына жасалған сапар аймақтың тарихын, діни философиясын және мәдени сабақтастығын тереңірек зерттеуге мүмкіндік берді. Аталған нысандар қатысушыларға сакралды кеңістіктерді тек сәулет ескерткіштері ретінде ғана емес, сонымен қатар халықтың ұжымдық жадысын, рухани тәжірибесін және тарихи өзіндік санасын бейнелейтін құндылықтар ретінде қарастыруға жол ашты. Бұл өз кезегінде ТДМ 4 аясында құндылыққа бағдарланған әрі пәнаралық білім беруді қалыптастыру міндеттеріне толықтай сәйкес келеді.

ТДМ 17 аясындағы серіктестікті іске асыруда Қожа Ахмет Ясауи атындағы Халықаралық қазақ-түрік университетіне жасалған сапар ерекше маңызға ие болды. Университеттің білім, ғылым және мәдениет салаларындағы институционалдық өзара ықпалдастығының нақты үлгілері ұсынылды. Университеттің қызметімен танысу және ЮНЕСКО-ның Бүкіләлемдік мұралар тізіміне енгізілген Қожа Ахмет Ясауи кесенесіне бару рухани және мәдени мұраны сақтау мен кеңінен насихаттау ісіндегі халықаралық ынтымақтастықтың маңыздылығын айқындады.

Аталған сапар этномәдени практиканың маңызды кезеңдерінің біріне айналып, қатысушылардың академиялық білім көкжиегін кеңейтумен қатар, қазақстандық мәдениеттің рухани бастауларына деген терең құрметті қалыптастыруға, мәдениетаралық диалогты нығайтуға және сакралды мұраның қоғамның орнықты дамуы контекстіндегі рөлін ұғынуға ықпал етті.