ҚазҰУ декандарына арналған тренинг өтті

Әл-Фараби атындағы Қазақ ұлттық университетінде ішкі басқару жүйесін трансформациялауға бағытталған білім беру марафоны өз мәресіне жетті. Университеттің Бизнес мектебі «Факультеттерді стратегиялық дамыту және декандардың басқарушылық құзыреттері» атты арнайы тренингтік бағдарламаны ұсынды.

Бұл жоба жоғары оқу орнының жаһандық амбициясын –  халықаралық бәсекеге қабілеттілікті арттыру мақсатында академиялық ортаға заманауи бизнес-тәжірибелерді интеграциялау жолындағы маңызды қадам болды.

Бес апталық тренинг бағдарламасы үш қарқынды модульге бөлінді. Мұндай формат қатысушыларға тек дәріс тыңдаумен шектелмей, оқуды күнделікті қызметпен ұштастыра отырып, стратегиялық жобалау үдерісіне терең бойлауға мүмкіндік берді.

Курстың негізгі менторы – ҚазҰУ Бизнес мектебінің EMBA бағдарламасының беделді оқытушысы Қайсар Мақан. Оның жетекшілігімен факультет басшылары өз құрылымдық бөлімшелерінің қазіргі жағдайына жан-жақты аудит жүргізді. Тренингтің маңызды ерекшелігі – теориялық абстракциялардан бас тарту: әрбір кейс факультеттердің нақты деректері негізінде талданды. Декандар миссия мен даму көрінісін қайта пайымдап, дарынды студенттер мен ірі индустриялық серіктестерді тартуға мүмкіндік беретін бірегей «өсу нүктелерін» айқындады.

Топтық пікірталастар мен воркшоптар барысында факультет басшылары тәуекелдерді басқарудың заманауи құралдарын және нарықтық үрдістерді талдау әдістерін меңгерді. Сонымен қатар тиімді командалар қалыптастыру және тез өзгеріп жатқан білім беру кеңістігінде өзгерістерді басқару дағдыларына – «soft skills» дамытуға ерекше назар аударылды.

Осы бір жарым айлық жұмыстың нәтижесінде факультеттерді басқару тиімділігін арттыруға және олардың орнықты дамуын қамтамасыз етуге арналған стратегиялық құжаттар мен практикалық құралдар әзірленді. Бұл – жай жоспарлар ғана емес, білім беру бағдарламаларын сапалы жаңғырту мен ғылыми-зерттеу әлеуетін күшейтуге бағытталған нақты іс-қимыл алгоритмдері. 

Әл-Фараби атындағы ҚазҰУ-дың Баспасөз қызметі