Журналистика факультетінде Ашық есік күні өтті

          26 ақпан 2026 жылы сағат 14:00-де Журналистика факультетінің №230 аудиториясында ерекше рухтағы, мазмұнды әрі тағылымды Ашық есік күні өтті. Іс-шараны Баспагерлік-редакторлық және дизайнерлік өнер кафедрасы ұйымдастырды. Бұл күн – мектеп бітіруші түлектер мен ата-аналар үшін мамандық таңдау жолындағы маңызды шешімге бағыт-бағдар берген сәт болды. Факультет деканының сөзі – сенімді қадамға шақыру. Жиынды Журналистика факультетінің деканы Қанат Әуесбайұлы ашып, факультеттің тыныс-тіршілігі, жетістіктері мен мүмкіндіктері туралы кеңінен баяндады. Ол редактор мамандығының әмбебаптығына ерекше тоқталды. «Редактор – тек мәтінді түзетуші емес, ол – ой сүзгісінен өткізетін, қоғамға бағыт беретін маман. Бұл салада білім алған студент журналист те, медиаменеджер де бола алады», – деген мазмұндағы ойы талапкерлерге ерекше әсер қалдырды. Декан сөзінің астарында бір ғана мақсат тұрды: талапкерлерге сенім ұялату, үлкен арманға батыл қадам жасауға шақыру. Келесі сөз кафедра меңгерушісі Айгүл Рамазанға берілді. Ол баспа ісінің қоғамдағы рөліне тоқталып, көпшілік шатастыра беретін «баспа» мен «баспахана» ұғымдарының айырмашылығын нақты түсіндірді. Баспа – идея туатын, мәтін өңделетін, редакцияланатын, көркемделетін шығармашылық әрі интеллектуалдық орта. Ал баспахана – дайын өнімді техникалық тұрғыда басып шығаратын өндірістік орын. Осы айырмашылықты мысалдар арқылы түсіндіруі талапкерлердің кәсіби көзқарасын қалыптастыруға ықпал етті.

        Шығармашылық емтихан – қорқыныш емес, мүмкіндік. Шығармашылық емтихан туралы толық ақпаратты оқытушы Қоңыр Мұқатаева берді. Ол емтиханның кезеңдері, тапсырма түрлері, талаптары мен дайындық жолдары туралы нақты мәлімет ұсынды. Ал Темірғали Көпбаев, баспа ісінің маңызын кеңінен талдап, оның журналистикамен байланысын түсіндірді. Оның айтуынша, бүгінгі цифрлық дәуірде сапалы мәтінге деген сұраныс ешқашан төмендеген емес. Керісінше, мазмұн сапасы – медианың негізгі капиталы. Кездесудің ең әсерлі тұстарының бірі – студенттердің өз тәжірибелерімен бөлісуі болды. Олар оқу үдерісі, тәжірибелік сабақтар, жобалар, шығармашылық орта туралы айтып, мамандықтың артықшылықтарын нақты мысалдармен жеткізді. Бұл сөздер талапкерлердің жүрегіне жетті. Өйткені ресми ақпараттан гөрі, студенттердің шынайы әсері сенімдірек қабылданады. Талапкерлер грант саны, шектік балл, шығармашылық емтиханның кезеңдері мен форматы туралы нақты сұрақтар қойды. Бұл сауалдарға Назерке Тілеубаева толық әрі нақты жауап берді. Әр сұрақ назардан тыс қалмады. Іс-шара соңында вебинар-ойын ұйымдастырылып, қатысушыларға түрлі сұрақтар қойылды. Дұрыс жауап берген оқушыларға сыйлықтар табысталды. Бұл кездесу атмосферасын жандандырып, талапкерлердің қызығушылығын арттырды. Ашық есік күні – жай ғана ақпараттық кездесу емес, болашаққа жол ашқан маңызды басқосу болды. Бұл күн көптеген жас талапкерге өз арманына бір қадам жақындауға мүмкіндік берді. Журналистика факультеті тағы бір мәрте өз есігін айқара ашып, «ҚазҰУ студенті болғың келе ме?» деген сауалға нақты жауап беруге жағдай жасады. Мүмкін, дәл осы аудиторияда отырған талапкерлердің бірі ертең білікті редактор, мықты журналист немесе креативті дизайнер атанар… Ал үлкен жол кішкентай қадамнан басталады.