ҚазҰУ-дың механика-математика факультеті Солтүстік-Батыс политехникалық университетінің (NPU) филиалдарымен ынтымақтастықты кеңейтуде

2026 жылғы 1 қыркүйекте механика-математика факультетінің деканы М.Е. Мансурова, компьютерлік ғылымдар кафедрасының меңгерушісі Нұрислам Қасымбек және Ақпараттық технологиялар және жасанды интеллект факультетінің Жасанды интеллект және Big Data кафедрасының меңгерушісі Т.С. Сарсембаева Солтүстік-Батыс политехникалық университеті (Northwestern Polytechnical University, ҚХР) филиалдарының өкілдерімен жұмыс кездесуін өткізді. Кездесудің басты тақырыбы оқытушылар мен студенттерге арналған академиялық ұтқырлық бағдарламаларын дамыту және бірлескен ғылыми-зерттеу бастамаларын жүзеге асыру болды. Солтүстік-Батыс политехникалық университеті (NPU) атынан Queen Mary University of London Engineering School of NPU және Moscow Aviation Institute of NPU деканы Фань Сяоли ханым, NPU Қазақстандық филиалының вице-президенті Сунь Ао ханым және NPU Қазақстандық филиалының жоба менеджері Ху Ин қатысты.

Ашық пікірталас барысында тараптар аэроғарыштық инженерия, электротехника, сондай-ақ жасанды интеллект, Computer Science және Data Science сияқты басым әрі жоғары технологиялық бағыттар бойынша өзара іс-қимыл перспективаларын талқылады.

Кездесу қорытындысы бойынша серіктестіктің бірнеше негізгі бағыты келісілді.

• ҚазҰУ студенттері NPU-дың мамандандырылған онлайн-курстарына қол жеткізеді. 

• ҚазҰУ жазғы және қысқы мектептер аясында Queen Mary University of London Engineering School of NPU және Moscow Aviation Institute of NPU студенттерін қабылдай алады.

• ҚазҰУ-дың «Аэроғарыштық инженерия» және IT бағыттары бойынша білім алушылары NPU-да қысқа мерзімді модульдік оқудан өте алады.

• Тараптар магистранттарға арналған алмасу бағдарламалары мен шетелдік тағылымдамаларды іске қосады.

• Университеттер бірлескен қолданбалы және іргелі ғылыми-зерттеу жобаларын әзірлеп, жүзеге асыра алады.

Қол жеткізілген уағдаластықтар озық инженерлік және IT-құзыреттерді факультеттің білім беру үдерісіне біріктіруге жаңа мүмкіндіктер ашады, сондай-ақ қазақстандық және қытайлық университеттер арасындағы халықаралық академиялық серіктестікті нығайтады.