ҚазҰУ түлектері Synfuels China компаниясындағы жұмысы туралы есеп берді

Әл-Фараби атындағы ҚазҰУ химия және химиялық технология факультетінің түлектері Жалғас Максотов пен Алмас Әлиев Synfuels China Technology Co., Ltd. компаниясының Пекиндегі кеңсесінде химиялық жобалау инженері қызметін атқара жүріп, компания басшылығы мен әріптестерінің алдында есеп берді. Баяндама компанияның ішкі шарасы — ғылыми негіздер мен мамандардың кәсіби дамуына арналған «2026 Science Fundamentals Workshop» аясында оқылды.Жас мамандар өз кәсіби жолы, Әл-Фараби атындағы ҚазҰУ-да алған білімі және физикалық химия, катализ және мұнай химиясы кафедрасындағы дайындығы туралы әңгімеледі. Сонымен қатар баяндамашылар компаниядағы жұмыстың алғашқы айларына — қандай міндеттермен айналысқандарына және осы уақыт ішінде қандай дағдылар меңгергендеріне тоқталды. Аудиторияның ерекше қызығушылығын университеттік білімнің инженерлік жұмыстағы практикалық қолданылуына арналған баяндама бөлімі тудырды: Aspen Plus бағдарламасында технологиялық процестерді модельдеу, көміртегі тотығының конверсиясы мен газдандыру процестерін есептеу, Фишер–Тропш синтезінің технологиялық схемаларын талдау. Түлектер физикалық, органикалық, аналитикалық және бейорганикалық химия, полимерлер химиясы сияқты іргелі зертханалық дайындық өндірістік міндеттерді сенімді шешуге көмектесетінін атап өтті. Түлектеріміздің табысты баяндамасы — Әл-Фараби атындағы ҚазҰУ мен Synfuels China Technology Co., Ltd. компаниясының ынтымақтастығының нақты нәтижелер беретінінің тағы бір дәлелі. 

Түлектеріміздің тәжірибесі университетте алған білім мен практикалық дағдылардың, кафедраның жүйелі жүргізілетін кәсіби бағдарлау жұмысымен үйлескенде, жас мамандардың халықаралық компанияда сенімді мансап құруына жол ашатынын нақты дәлелдейді.

Гауһар Ерғазиева, Әл-Фараби атындағы ҚазҰУ химия және химиялық технология факультетінің физикалық химия, катализ және мұнай химиясы кафедрасының меңгерушісі, химия ғылымдарының кандидаты, профессор.