Гүлжанат Танабекова Сиверс алмасының зиянкестері жөніндегі зерттеу нәтижелері мен жаңа монографиясын таныстырды

2026 жылғы 14 тамызда Талдықорған қаласында Сиверс алмасының тарихи және биологиялық құндылығы мен оны сақтаудың ғылыми негіздеріне арналған халықаралық ғылыми-практикалық конференция өтті.  Іс-шара академик Аймақ Жанғалиевтің туғанына 113 жыл  толуына орай  ұйымдастырылып, ғалымдарды, экологтарды,  табиғат  қорғау  ұйымдарының  мамандары мен өлкетанушыларды біріктірді.

Философия докторы (PhD) Гүлжанат  Танабекова Жетісу  Алатауындағы Сиверс  алмасының зиянкес жәндіктерінің  экологиялық топтары туралы баяндама жасады. Зерттеуде осы түрдің  табиғи популяцияларына  зиян келтіретін жәндіктердің түрлік құрамы, трофикалық байланыстары және таралу ерекшеліктері қарастырылды.

Пленарлық отырыста Г.Б. Танабекованың «Іле және Жетісу  Алатауындағы Сиверс  алмасының зиянкес жәндіктері»  атты монографиясы таныстырылды.  Басылымда зиянкестердің аннотацияланған тізімдері, олардың экологиялық сипаттамалары, таралу карталары және Сиверс алмасының табиғи популяцияларына кері әсерді азайту жөніндегі  ұсынымдар қамтылған.

Монография табиғатты қорғау және ауыл шаруашылығы салаларының мамандарына арналған. Сондай-ақ оны биология, зоология, энтомология  және экология бағыттары бойынша  білім беру бағдарламаларында пайдалануға болады.

Гүлжанат Танабекованың Сиверс алмасының зиянкестерін зерттеуге арналған ғылыми зерттеуі, сондай-ақ таныстырылған жаңа монография Экожүйелер мен  биоалуантүрлілікті қорғау бойынша Орталық Азия – Герман  институтының табиғи генетикалық әртүрлілікті зерттеуге және сақтауға бағытталған ғылыми-зерттеу жұмыстары үшін маңызды мәнге ие.