1 қыркүйек – Білім күні және жаңа оқу жылының басы

Колледждің 1-курс білім алушылары мен бейіндік мектептің оқушыларына арналған 1 қыркүйек мерекесі Қазақстан Республикасы Тәуелсіздігінің 25 жылдығына арналған салтанатты жиынмен басталды.

«Бүгін 100-ден аса білім алушы колледж табалдырығын аттады. ҚазҰУ колледжіндегі белсенді өмір жастарға сапалы білім алуға және өзінің шығармашылық әлеуетін жүзеге асыруға мүмкіндік береді. Мұнда рухани, кәсіби және шығармашылық қағидасына негізделген жағымды, дамытушы орта жасалған», – деп жоғары оқу орнына дейінгі білім беру факультетінің деканы Жарылқасын Жаппасов 1 курс студенттерін қарсы алды. Сондай-ақ бейіндік мектеп директоры Дария Алпысбаева да студенттерді білім күнімен құттықтап, оқуда сәттілік, игі жаңалықтар мен толағай табыстар тіледі.

Білім алушыларды сапалы дайындау – ҚазҰУ колледжінің білім мен тәрбие берудегі негізгі міндеттерінің бірі. Колледж түлектері арасында алдыңғы қатарлы отандық және шетелдік ЖОО-ларға түсушілер санының өскендігі байқалады. ҚазҰУ колледжі мен бейіндік мектебінде эксперименталды білім беру бағдарламасы енгізілген және оқыту үдерісі кредиттік жүйеге көшірілген. Білім берудегі сабақтастық мәселесі ескеріле отырып, мектеп, колледж, ЖОО жүйесінің өзара бірлікте қызмет етуі сапалы білім алуға септігін тигізеді. Колледждегі студенттердің білімінің сапалық көрсеткіші – олардың халықаралық пәндік олимпиадалардағы, ғылыми-практикалық конференциялардағы және әртүрлі байқаулардағы жеңістерімен сипатталады. Колледж көптеген жылдар бойы өзінің ісін кәсіп еткен білікті мамандар даярлап келеді. Колледжде ұмтылмас күндер өткізген мыңдаған түлектер биік белестер мен жеңістерді бағындыруға әзір.

Салтанатты жиын колледж студенттері мен бейіндік мектеп оқушылары дайындаған концерттік бағдарламамен жалғасты. Игі дәстүр бойынша алғашқы қоңырау соғылып, «Мен – өз елімнің патриотымын» атты кураторлық сағаттар өткізілді. Танысу апталығы аясында бірінші курс студенттері ҚазҰУ колледжінің оқу және тәрбие үдерісінің ұйымдастырылуы туралы ақпарат алды.

Қымбатты достар! Сіздерді жаңа оқу жылының басталуымен құттықтаймыз! Сіздерге болашақ мамандықты игеру жолында сәттілік, табандылық, қажымас қайрат тілейміз. ҚазҰУ колледжіндегі оқу сіз үшін абыройлы болашаққа бастар жол болсын!

Колледж директоры, п.ғ.к., доцент Нурканова Р.О.