11-ТДМ. Тұрақты қалалар мен елді мекендер. Ә. Қастеев атындағы Қазақстан Республикасының Мемлекеттік өнер музейінде студенттерді Қазақстанның көркем мұрасымен таныстыру

2026 жылғы 24 қазанда География және табиғатты пайдалану факультетінің «Туризм» мамандығының 1-курс студенттері орыс филологиясы және әлем әдебиеті кафедрасының оқытушысы Н.Қ. Имамбекпен бірге Әбілхан Қастеев атындағы Қазақстан Республикасының Мемлекеттік өнер музейіне оқу-танымдық экскурсия жасады. Музейге бару білім алушылардың мәдени танымын кеңейтуге, ұлттық және әлемдік көркем мұрамен таныстыруға, сондай-ақ тарихи-мәдени құндылықтарға құрметпен қарау көзқарасын қалыптастыруға бағытталды.

Экскурсия барысында студенттер музей кеңістігімен, бейнелеу өнерінің әртүрлі бағыттары мен даму кезеңдерін танытатын көркем туындылар және көрме жобаларымен танысты. Өнер туындыларын сақтау, зерттеу және насихаттау арқылы қоғамның мәдени мұрасын қорғаудағы музейдің маңызына ерекше назар аударылды.

Музейде ұсынылған уақытша көрмелер ерекше қызығушылық тудырды. Олардың қатарында Мәскеудегі Третьяков галереясының қорынан алынған туындыларды қамтитын «XX ғасыр өнері» көрмесі бар. Сонымен қатар музей ғимаратының 50 жылдығына арналған «Сәулеттің тірі болмысы» көрмесі ұсынылды. Онда сәулеттік сызбалар, архивтік фотосуреттер, үш өлшемді модель және 1976 жылы музейдің ашылуына орай сыйға тартылған Фальк пен Редьконың картиналары қамтылған. Бұдан бөлек, Нұршидин Баратовтың пейзаждық туындылары мен Қазақстан табиғатының сұлулығын таныстыратын «Мұзафар әндері» көрмесі де назар аудартты.

Өнер туындыларымен танысу студенттерге көркем бейнелердің тарихи дәуірді, мәдени дәстүрлерді, ұлттық дүниетаным ерекшеліктерін және қоршаған ортаны қалай бейнелейтінін түсінуге мүмкіндік берді. Экскурсия жаңа білім алумен қатар, тарихи жады мен мәдени бірегейлікті сақтаудағы өнердің рөлін тереңірек ұғынуға ықпал етті.

Музей ортасымен тікелей танысу студенттердің эстетикалық талғамын, байқағыштығын және мәдени мұраға деген қызығушылығын дамытуға ықпал етті.

Өткізілген экскурсия мәдени және табиғи мұраны қорғау мен сақтауға бағытталған 11-ТДМ міндеттеріне сәйкес келеді. Мұндай танымдық іс-шаралар жас ұрпақтың өнерді бағалауына, тарихи жадыны құрметтеуіне және елінің мәдени байлығына ұқыпты қарауына ықпал етеді.