«Ұлттық қор – балаларға» жобасы: жастардың қаржылық мүмкіндіктеріне жол ашатын кездесу

2026 жылғы 13 қазанда әл-Фараби атындағы Қазақ ұлттық университетінде «Отбасы банк» АҚ қызметкерлерінің қатысуымен студенттерге арналған ауқымды ақпараттық кездесу ұйымдастырылды. Іс-шара барысында «Ұлттық қор – балаларға» жобасының негізгі бағыттары, қаражатты алу тәртібі және оны тиімді пайдалану мүмкіндіктері туралы жан-жақты ақпарат берілді.

Кездесудің басты мақсаты – студенттердің мемлекеттік жоба туралы хабардарлығын арттыру, 18 жасқа толған азаматтарға өз атына жинақталған қаражатты алу жолдарын түсіндіру және қаржылық сауаттылығын дамытуға қолдау көрсету.

Іс-шара барысында «Отбасы банк» мамандары жоба аясында жинақталған қаражатты алу тәртібіне, депозит ашу ерекшеліктеріне және қаражатты жинақтау жолдарына кеңінен тоқталды. Студенттерге депозит рәсімдеу кезінде ескерілетін негізгі талаптар, жинақ қаражатын тиімді басқару және болашақта тұрғын үй жағдайын жақсартуға бағытталған мүмкіндіктер туралы түсініктемелер берілді.

Сонымен қатар банк қызметкерлері студенттерге қажетті рәсімдерді орындау бойынша бағыт-бағдар ұсынып, өз атына жинақталған қаражатты алу және депозит ашу мәселелеріне қатысты практикалық көмек көрсетті. Мамандар қаржылық жоспарлаудың маңыздылығына тоқталып, жинақ қалыптастыру мен қаражатты мақсатты пайдаланудың тиімді жолдарын түсіндірді.

Кездесу ашық диалог форматында жалғасып, студенттер өздерін толғандырған сұрақтарын қойып, банк мамандарымен пікір алмасты. Қатысушылар тұрғын үй алу, депозит ашу, қаражат жинақтау және жобаның басқа да мүмкіндіктері туралы сұрақтарына нақты жауаптар алды.

Осындай ақпараттық кездесулер жастардың қаржылық сауаттылығын арттыруға, мемлекеттік бағдарламалар туралы білімін кеңейтуге және болашаққа қатысты қаржылық шешімдерді саналы түрде қабылдауына ықпал етеді.

Әл-Фараби атындағы Қазақ ұлттық университеті студенттердің жан-жақты дамуына, олардың әлеуметтік және қаржылық сауаттылығын арттыруға бағытталған бастамаларды қолдайды. «Отбасы банк» АҚ өкілдерімен өткізілген кездесу білім алушыларға қажетті ақпарат алып, өз мүмкіндіктерін тиімді пайдалану жолдарын түсінуге мүмкіндік берді.