Ғылымға қадам: мектеп оқушылары ҚазҰУ-дың ғылыми зертханаларымен танысып, Тұрақты даму мақсаттарына бағдар алды

Әл-Фараби атындағы Қазақ ұлттық университетінің физика-техникалық факультеті заманауи ғылымды дәріптеу және мектеп оқушыларына сапалы кәсіби бағдар беру бағытындағы белсенді жұмысын жалпы білім беретін мекемелермен ынтымақтастық аясында жүйелі түрде жүзеге асырып келеді. 2026 жылғы 6 қарашада факультетте кезекті маңызды кәсіби бағдар беру кездесуі өтті. Бұл жолы университет қонақтары ретінде ФизТех, №134 мектеп және Global мектептерінің жоғары сынып оқушылары келді.

Мектеп оқушыларымен кәсіби бағдар беру және таныстыру жұмысын жылуфизика және техникалық физика кафедрасы меңгерушісінің оқу ісі жөніндегі орынбасары Шортанбаева Жанар Каиржановна жүргізді. Ол факультеттің басты ғылыми-білім беру бағыттары, кафедраның ғылыми-зерттеу қызметі, заманауи білім беру бағдарламалары мен университетте білім алудың кең мүмкіндіктері туралы егжей-тегжейлі ақпарат берді.

Ал ғылыми зертханаларға арнайы экскурсияны кафедра доценты Жұманов Мерген Амирович жүргізді. Оқушылар факультеттің заманауи ғылыми жабдықтарымен, бірегей зерттеу қондырғыларымен және тәжірибелік-физикалық жұмыстардың ерекшеліктерімен жақын танысты. Буын өкілдеріне арналған бұл кездесудің басты ерекшелігі - мектеп оқушылары тек тыңдаушы болып қалмай, ғылыми тәжірибелерге өздері белсенді қатысуға мүмкіндік алды. Олар зертханалық құрылғылармен жұмыс істеп көріп, зерттеу барысында туындаған қызықты сұрақтарына ғалымдардан тікелей жауап алды. Теориялық білімді нақты тәжірибемен ұштастыру оқушылардың физика мен техникалық ғылымдарға деген қызығушылығын арттырды.

Оқушылар Физика-техникалық факультетінде төрт сағатқа жуық уақыт өткізіп, университеттің академиялық және ғылыми ортасына толық бойлады. Олар ғылыми эксперименттерге зор қызығушылық танытып, болашақ мамандықты таңдау бойынша пікір алмасты.

Аталған кәсіби бағдар беру және ғылыми-ағартушылық іс-шара БҰҰ-ның Тұрақты даму мақсаттарын (ТДМ) практикалық деңгейде жүзеге асырумен тікелей байланысты:

• 4-мақсат: Сапалы білім - оқушылардың ғылыми дүниетанымын кеңейтуге, сапалы жаратылыстану-ғылыми білімді дәріптеуге және жас дарындардың интеллектуалдық әлеуетін дамытуға бағытталған;

• 9-мақсат: И индустрия, инновациялар және инфрақұрылым - оқушыларды заманауи ғылыми-техникалық инфрақұрылыммен, инновациялық технологиялармен және отандық ғылыми әзірлемелермен таныстыруды көздейді;

• 17-мақсат: Мақсаттар жолындағы серіктестік - мектептер мен университет арасындағы ғылыми-білім беру байланыстарын нығайтып, болашақ ғалымдар мен инженерлерді даярлаудағы тиімді ынтымақтастықты қамтамасыз етеді.

Университет пен мектеп арасындағы осындай тығыз байланыстар оқушылардың болашақ кәсіби бағдарын айқындап, ғылымға келетін жаңа жас ұрпақтың қалыптасуына зор ықпал етеді.