Жаһандық ғылымға жол ашқан тарихи қадам: ҚазҰУ-да «ICESCO Chair» өкілдігі ашылды! — ҚазҰУ

Жаһандық ғылымға жол ашқан тарихи қадам: ҚазҰУ-да «ICESCO Chair» өкілдігі ашылды!

17 қараша 2026
Жаһандық ғылымға жол ашқан тарихи қадам: ҚазҰУ-да «ICESCO Chair» өкілдігі ашылды!


Әл-Фараби атындағы Қазақ ұлттық университетінің Философия және саясаттану факультеті халықаралық ғылыми-білім беру кеңістігіндегі кезекті ірі жетістігіне қол жеткізді. «Философия. Этика. Болашақ» атты Әл-Фараби халықаралық симпозиумы аясында университет ректоры Жансейіт Түймебаев пен Ислам әлемінің білім, ғылым және мәдениет ұйымының (ICESCO) бас директоры Сәлім Әл-Мәлік стратегиялық маңызы зор меморандумға қол қойды.
Осы тарихи құжат негізінде факультеттің Дінтану және мәдениеттану кафедрасына ресми түрде ICESCO өкілдігінің (ICESCO Chair) мәртебесі берілді. Бұл –  факультет пен кафедраның ғылыми әлеуеті мен халықаралық беделінің жоғары деңгейде мойындалуының айқын дәлелі.
Жаңа өкілдіктің қызметі үш басты бағытта жүзеге асатын болады:
-    Ғылыми-зерттеу қызметі: Дінтану мен мәдениеттану саласындағы іргелі зерттеулер тереңдетіліп, ислам әлемі мен Орталық Азияның ортақ тарихи-мәдени мұрасы жаңаша қырынан зерделенеді.
-    Білім беру және әлеуетті арттыру: ICESCO-ға мүше мемлекеттердің студенттері мен жас зерттеушілері үшін арнайы курстар, кәсіптік даярлау бағдарламалары әзірленіп, жазғы мектептер мен академиялық ұтқырлық бағдарламалары ұйымдастырылады.
-    Диалог және ағартушылық: Жаһандық деңгейдегі халықаралық конференциялар мен ғылыми семинарлар өткізіліп, бірлескен беделді ғылыми жарияланымдар жарық көреді.
Философия және саясаттану факультетінің ұйытқы болуымен жүзеге асқан бұл ауқымды жоба отандық ғылымның көкжиегін кеңейтіп, ҚазҰУ-ды Орталық Азия мен ислам әлемі арасындағы зияткерлік диалогтың басты орталығына айналдыра түспек.