- Басты бет
- Жаңалықтар
- Фарабитанудың жаңа көкжиегі: Қытайда «Әл-Фараби орталығының Институты» филиалы ашылады!
Фарабитанудың жаңа көкжиегі: Қытайда «Әл-Фараби орталығының Институты» филиалы ашылады!
Әл-Фараби атындағы Қазақ ұлттық университетінің жаһандық ғылыми-мәдени ықпалы кеңейіп келеді. «Философия. Этика. Болашақ» халықаралық симпозиумы аясында тағы бір стратегиялық маңызы зор келісімге қол қойылды.
ҚазҰУ ректоры Жансейіт Түймебаев пен Қытай Халық Республикасының Чжэнчжоу университетінің өкілі Цьян Цзяньчэн қол қойған меморандум негізінде Чжэнчжоу университетінің базасында ҚазҰУ-дың «Әл-Фараби» ғылыми-мәдени орталығының кезекті шетелдік филиалы ашылатын болды.
Жаңа ғылыми-білім беру орталығы келесідей ауқымды бағыттар бойынша жұмыс істейді:
- Бірлескен ғылыми еңбектер мен аудармалар: Ұлы ойшылдың мұрасын терең зерттеуге бағытталған бірлескен ғылыми жарияланымдар, монографиялар мен аударма еңбектер әзірленеді.
- Цифрлық және кітапханалық қор: Авторлық құқықтарды қатаң сақтай отырып, арнайы тақырыптық кітапхана мен заманауи электрондық ғылыми ресурстар базасы жасақталады.
- Халықаралық коллаборация: Орталық болашақта әлемнің өзге де жетекші ғылыми-зерттеу ұйымдарымен әріптестік орнатып, ортақ жобаларды жүзеге асыратын зияткерлік алаңға айналады.
Философия және саясаттану факультетінің тікелей бастамасымен іске асып жатқан бұл жоба — Әбу Насыр әл-Фарабидің рухани мұрасын Шығыс пен Батыс арасындағы алтын көпір ретінде дәріптеудің және қазақстандық ғылымның халықаралық беделін арттырудың жарқын көрінісі.
Басқа жаңалықтар