Биология және биотехнология факультетінің биофизика және биомедицина кафедрасының «Биофизика және биомедицина проблемалары» студенттер үйірмесі мен куратор-эдвайзерлерінің және «Сұңқар» студенттер кәсіподағының ұйымдастыруларымен «Ұстаздық ұлы қызмет» тақырыбында ардагер-ұстаз б.ғ.д., профессор, ҚР ҰҒА академигі Х.Д.Дүйсембинмен кездесу кеші өтті.
Кездесу кешіне университетіміздің тәрбие жұмысы және тіл саясатын ұйымдастырушылық-әдістемелік қамтамасыз ету бөлімінен С.С.Жандыбаева, биология және биотехнология факультетінің оқу-әдістемелік және тәрбие жұмысы жөніндегі деканның орынбасары, доцент Г.К.Сатыбалдиева, факультеттің аға эдвайзері С.Е.Шарахметов, биоалуантүрлілік және биоресурстар кафедрасының аға куратор-эдвайзері А.Т. Мамурова және студенттер қауымы қатысты. «Биофизика және биомедицина проблемалары» студенттер үйірмесінің төрайымы 4 курс студенті Т.Артыққызы кештің мақсатын түсіндірсе, биофизика және биомедицина кафедра меңгерушісі, профессор С.Т.Төлеуханов ғалым-ұстазымыздың еңбек жолымен таныстырды. Ардагер-ұстаз Х.Д.Дүйсембин балалық шағы мен студенттік өмірінен бастап қиындығы мен қуанышы қатар жүретін ғылым жолымен, қазақ тілінде жарық көрген оқулықтары мен ғылыми еңбектерімен таныстырды. Қарапайым адамнан қазірде ел таныған, өз еліміз ғана емес шетел ғалымдары мойындаған академик, ел ағасына айналып отыр. Студенттер ғалым-ұстаздан зерттеу жұмыстарындағы кездескен қиындықтарды шешу жолынан, басынан өткен әртүрлі қызықты оқиғалары жайлы сұрап, ұтымды жауаптар алды.
Ұлағатты ардагер ұстазға кафедраның озат студенттері Молдабекова Әсел мен Үсіпбек Ботагөз жүректерінен шыққан шәкірт лебізін білдірді. Кафедра меңгерушісі, профессор С.Т.Төлеуханов кафедра ұжымының және «Сұңқар» студенттер кәсіподағының атынан естелік сыйлықтар табыстады, естелікке суреттерге түсті. Кеш көңілді әрі қызықты өтті. Қарапайым ғана ауыл баласының білім жолындағы жүрген асқақ жолы студенттер қауымына үлгі-өнеге болды.
Басқа жаңалықтар
