ENACTUS KazNU болашағына сенім мол
Университеттік ENACTUS ұйымының белсенді қатысушысы және оның дамуына үлкен үлес қосқан «Математика» мамандығының 3-курс студенті Айнұр Базарханды әңгімеге тартқан едік.
– Айнұр, ENACTUS қандай ұйым?
– ENACTUS – студенттер мен жастар арасындағы көшбасшылық пен кәсіпкерлікті дамытуға арналған коммерциялық емес халықаралық ұйым. Ұйым бизнес-жобаларды қолдап, олардың дамуына жұмыс істейді. ENACTUS бизнес-жобалары әлеуметтік, экологиялық, коммерциялық және инновациялық бағыттарды қамтып, тұрақты даму мақсаттарына сәйкес құрылады. Ұйымның әлем бойынша 550-ден астам серіктестері бар. Оның ішінде Қазақстаннан да серіктестер бар.
– Ұйымның тарихы жайлы не айтасыз?
– Жоба 1975 жылы SIFE атауымен АҚШ-та бастау алған. 1994 жылы халықаралық деңгейде танылды.1995 жылдан бастап SIFE қатарына Орталық Азия мемлекеттері қосылып, Қазақстанда жұмыс істей бастады. 2012 жылы өткен әлем кубогында (World Cup) жобаның жаңа атауы ENACTUS деп өзгертілді.
– Атауы мен логотипі қандай мағынаны білдіреді?
– ENACTUS – Enterpreneurship in action, Entrepreneurial, Action, US – бизнеске инновация енгізіп, студенттік, академиялық ортада әлеуметтік кәсіпкерлікті дамыту. Жобаның логотипі ретінде бақыт пен бейбітшіліктің классикалық символы болатын сары тырна бейнеленген.
– Ұйым қалай жұмыс істейді?
– ENACTUS елімізде жастар арасында өте танымал. Ұйым Қазақстанда бірнеше университет пен мектептерде жұмыс істейді. Enactus Kazakhstan Road Show – жылдық мақсаттармен танысу, Business Collaboration Forum – Қазақстандағы ENACTUS командаларының форумы өтеді. Жыл сайын әлем бойынша командалар арасында ұлттық сайыстар ұйымдастырылады. Ұлттық сайыстың жеңімпаздары болған ENACTUS командалары өз жобаларын мемлекет атынан әлем кубогында таныстырады. Жеңімпаз командаларға ақшалай сыйлықтар мен бизнес-жобалардың қаржыландырылуы беріледі. Сонымен қатар ұйымда жастарға арналған қыстық және жаздық лагерьлер бар. Лагерьде әртүрлі командалар бір-бірімен танысып, бизнес-тренингтерге қатысады.
– Биыл ұлттық кубок пен әлем кубогы қалай өтті?
– ҚазҰУ ENACTUS командасы Астана қаласында өткен ENACTUS Kazakstan National EXPO ұлттық кубогына қатысты. Өкінішке қарай, әлем кубогына жолдама ала алмадық. Дегенмен Е.Бөкетов университетінің ENACTUS командасы (Қарағанды қаласы) ұлттық кубок иегері атанып, әлем кубогында еліміздің намысын қорғайтын болды. Әлем кубогы қазан айында Нидерланды мемлекетінің Утрехт қаласында өтті. Әлем кубогының иегері болып Египеттің ENACTUS командасы танылды. 2024 жылы әлем кубогы еліміздің Астана қаласында өтетіні туралы шешім қабылданды. Біздің университет командасы 2001 жылы Лондон қаласында өткен әлем кубогында арнайы «Жыл серпілісі» сыйлығына ие болған. Алдағы уақытта командамыз биік шыңдарды бағындырады деп сенемін.
– ENACTUS-тың жастардың тұлға болып қалыптасуына әсері қандай?
– Бизнес-жобаларды дайындау кезінде командамен жұмыс істеу, жаңа идеяларды ойлап табу адамның бәсекеге қабілеттілігін арттырады. Құжаттарды сауатты толтыру, сахна алдында сөйлеу, қаржымен жұмыс істеу soft skills-ті дамытады. Одан бөлек, өткен оқу жылы кәсіпкерлік бойынша қосымша сабақтар жүргізілуінің нәтижесінде біз бизнес-жобаларды құруды меңгеріп шықтық. KMF&KMF демеулік компаниясының Finboss қаржылық сауаттылыққа байланысты байқауы кезінде мектеп оқушыларымен жұмыс атқардық. ENACTUS өзіме жаңа достар мен кәсіпкерлік орта, тәжірибе берді. Студенттік өмірімнің қызықты кезеңдерін осы ұйыммен бірге бөліскеніме қуаныштымын. ENACTUS-тың қатарында болып, әлемнің дамуына бірге үлесімізді қосайық.
Сұхбаттасқан
Ақнұр ЖОЛДАСБЕК,
Тұрақты даму бойынша ЮНЕСКО кафедрасының оқытушысы
Басқа жаңалықтар
