Оқытушы – оқытушылық қызметпен де, тәрбие жұмысымен де айналысатын маман. Сондықтан оқытушының міндеті – қажетті білім беру ғана емес, сонымен бірге белгілі бір білім алу қажеттілігін түсінбеген кезде студенттерге көмек беру.
ЖОО оқытушысының педагогикалық қызметінің негізгі сипаттамасы – педагогикалық құзыреттілік, ол педагогика, психология білімдерін меңгеруді қажет етеді әрі оқытушының оқу процесіне оқытудың заманауи әдістері мен технологияларын енгізуге қатысты үнемі жетілдірілуін анықтайды.
Ұстаз бейнесін көз алдыма елестеткенде, ең алдымен, мейірімді, өзіне қызығушылық таныта алатын және студенттермен қарым-қатынасы жақсы тұлға тұрады. Өйткені оқытушы мен студенттер бірге жұмыс істейді. Мысалы: студенттердің өзіндік, курстық, дипломдық жұмыстарымен айналысуы, сонымен қатар студенттердің кейде көмекке жүгінуі барысында оқытушының кеңестері өте қажет. Мұнда тағы бір маңызды нәрсе пайда болады, ол – оқытушының эмпатия қабілеті, яғни бұл қабілет студенттерге жанашырлық таныту, олардың жағдайын түсінуге деген ұмтылыс. Сондай-ақ маңызды қасиеттердің ішінде оқытушының өз пәнін жетік білуі деп білемін және ішкі харизмамен анықталған әзіл сезімі де қалыс қалмауы қажет.
Педагогика мамандығында сөйлеу өте маңызды, әрбір сөзі мәнерлі, эмоционалды, сенімділік ұялата алатындай түрлі болуы қажет. Сонымен бірге өз ойларыңызды сауатты, түсінікті, қарапайым түрде студенттерге жеткізе білу де шеберліктің белгісі. Мен үшін осындай қасиеті бойында бар оқытушы – Гүлбаршын Азисқызы. Алғашында қарапайым ғана болып көрінген оқытушымның бар қасиеті ішінде бүгулі екен. Салған беттен-ақ бізді білім мұхитының кемесіне мінгізіп-ақ жіберді. Әрдайым бізге жөн сілтеп, бағдар беріп отырады. Қазір ойлап қарасам, ұстаздың қасиеті осында екен. Атап айтқанда: оқытушының бойында студенттермен жұмыс істеуге деген бейімділік, өз пәніне қызығушылық таныту мүмкіндігі, қиналсаң қолдап, жабықсаң жәрдемдесер, өмір сынына қарсы тұрар қайратыңды жанитын, көзқарасы салқын болса да, жылулық ұшқыны байқалатын тұлға ретінде осы кісіні айта аламын. Бұл менің шәкіртінің өзінен озуын тілейтін ұстазым жайлы бір үзік сырым.
Сюэхун ПЭН,
филология факультеті
«Орыс тілі мен әдебиеті» мамандығының
4-курс студенті
Басқа жаңалықтар
