ҚазҰУ-да зерттеу университетінің даму бағыттары талқыланды

Әл-Фараби атындағы Қазақ ұлттық университетінде Professional Week-2024 аясында ҚазҰУ-дың 90 жылдығына арналған «Зерттеу университетін дамытудың заманауи трендтері»  тақырыбында сараптамалық стратегиялық сессиясы өтуде.

Іс-шараға білім беру саласындағы жетекші отандық және шетелдік сарапшылар, профессор-оқытушылар құрамы және Қазақстанның жоғары оқу орындарының білім алушылары қатысты.

Әл-Фараби атындағы ҚазҰУ-дың академиялық мәселелер жөніндегі проректоры Ләззат Еркінбаева  жиынға қатысушыларды еліміздің жетекші жоғары оқу орнының 90 жылдығымен құттықтап, сөз сөйледі.

«Бүгінгі таңда біздің міндетіміз – аса маңызды мәселелерді талқылау. Ол – университеттің білім беру стратегиясы мен зерттеу университеттеріне баса назар аудару; жоғары білім мен ғылым саласында цифрлық трансформацияны жүзеге асыру жолдары, инклюзивті білім берудің трендтері. Ең бастысы – білім беру сапасын қалай арттыруға болады деген сауал. 2023 жылы жоғары білім мен ғылым туралы Ұлттық баяндама кеңінен талқыланды. Бүгін біз жоғары білім саласындағы заманауи трендтер мен сын-қатерлерді талқылаймыз».

Пленарлық отырыста Ғылым және жоғары білім министрлігінің Жоғары және жоғары оқу орнынан кейінгі білім беруді дамытудың ұлттық орталығының «Мамандығым – болашағым» жобалық тобының жетекшісі Олжас Сәкенов  баяндамасымен таныстырды. «Біздің ұйым ғылым және жоғары білім министрі Саясат Нұрбек алдымызға қойып отырған түрлі жобалар мен міндеттерді жүзеге асыруда. Олар – шетелдік филиалдарды ашу, ғылыми әзірлемелерге жаңа серпін беру, жастарды ғылымға тарту, әлемде қолданылып жүрген инновациялық әдіснамаларды іске асыру», – деп атап өтті спикер.

Пленарлық отырыста И.Арабаев атындағы Қырғыз мемлекеттік университетінің оқу жөніндегі проректоры, техника ғылымдарының докторы, профессор Талантбек Құрманбекұлының «ЖОО-дағы білім беру жүйесін цифрлық трансформациялау» баяндамасы тыңдалды. Спикер өз сөзінде ғылым мен жоғары білімнің цифрлық трансформациясының кезеңдері мен алғышарттарын және стратегияны әзірлеу қажеттігін атап өтті. «Цифрлық университет» жүйесін енгізу кез келген ЖОО-ға қажетті бағытта жүйенің функционалдығын дербес дамытуды, пысықтауды және кеңейтуді жүзеге асыруға мүмкіндік беретін заманауи платформа негізінде толыққанды электрондық ақпараттық білім беру ортасын қалыптастыруға көмектеседі», – деп атап өтті.

Жиын барысында педагогика ғылымының кандидаты, қауымдастырылған профессор, Торайғыров атындағы университеттің академиялық артықшылық орталығы басшысының м.а., Жоғары білім беруді дамыту ұлттық орталығының сарапшысы Марина Скиба, «Антиплагиат» компаниясының атқарушы директоры Юрий Чехович және басқалар өзекті тақырыптар бойынша баяндама жасады.

Бұдан әрі іс-шара «Білім беру бағдарламаларын жобалау: проблемалар мен перспективалар» және «Білім берудің цифрлық трансформациясы», «Оқыту мен оқытудың инновациялық технологиялары», «Инклюзивті білім беру», «Оқыту және оқыту сапасы: оқытушының рөлін трансформациялау» интерактивті сараптамалық панельдік сессиялар шеңберінде жалғасты.

Сарапшылар кәсіби стандарттар негізінде білім беру бағдарламаларына сұранысқа ие дағдылар мен құзыреттерді жедел интеграциялау үшін еңбек нарығының қажеттіліктері, оқытуға тең қолжетімділік қағидаты негізінде білім алушылардың әртүрлі топтары үшін тиімді және қолжетімді оқытуды қамтамасыз ету үшін зерттеу университетінің цифрлық трансформациялау стратегиясын әзірлеу сияқты өзекті мәселелерді талқылады.

Әл-Фараби атындағы ҚазҰУ-дың Баспасөз қызметі