Ғылымдағы жас көшбасшылар отырысы өтті

Әл-Фараби атындағы Қазақ ұлттық универ­си­тетінде ҚР Ұлттық ғылым академиясы жас көшбас­шы­ла­ры­ның отырысы өтті.

Жиынға ҚР ғылым және жо­ғары білім министрі Сая­сат Нұрбек, Ұлттық ғылым ака­де­мия­сының прези­ден­ті Ақылбек Күрішбаев, Әл-Фараби атын­дағы ҚазҰУ-дың Басқарма Тө­рағасы – Ректоры Жансейіт Түйме­баев, ҚР Президентінің жа­нындағы Ұлттық құрылтай мен Ғылым және техноло­гия­лар жөніндегі ұлттық кеңестің мү­ше­лері, жоғары оқу орын­дарының және ҒЗИ-дың жас ға­лымдары қатысты.

Отырыс барысында жетекші жас ғалымдар ғылыми эко­жүйе­ні дамыту және ғылыми зерттеулердің басым бағыт­та­ры бойынша өз идеяларымен бөлісті. Сондай-ақ жас ғалым­дар­дың ғылымдағы рөлін арт­тыру және оларды әлеу­меттік қолдау шаралары туралы өз ұсыныстарын ортаға салды.

Іс-шараны Ұлттық ғылым ака­демиясының президенті Ақылбек Күрішбаев ашты. «Ұлттық ғылым академиясының басты міндеті – ел эконо­ми­касының дамуына үлес қосуға қа­білетті және дарынды жас­тар­ды тарту орталығына ай­налу. Академияның қызметін одан әрі дамытуда және же­тіл­діруде жас ғалымдардың пікірі біз үшін маңызды. Түйткілді мәселелердің барлығын бүгінгі жиында талқылайтын боламыз. Академия басшысы ретінде жас ғалымдардың өз ұсы­ныс­тарын жеткізіп қана қоймай, ғы­лыми саладағы өзекті мәсе­лелерді шешуге тікелей қа­тыс­қанын қалаймын», – деді Ақыл­бек Күрішбаев.

Сөз соңында академия пре­зиденті ҚР ҰҒА жанынан алғаш рет Жас ғалымдар кеңесінің құ­рылғанын жеткізді. Кеңес елі­міздің жас ғалымдарын бі­рік­тіретін және өз қызметі үшін барлық қажетті өкілет­тік­терге ие беделді ұйымға айналады.

ҚР ғылым және жоғары білім министрі Саясат Нұрбек сөз сөй­леп, ЖОО-лардағы ғалым­дар­дың рөлі күннен-күнге ар­тып жатқанын айтты. Бүгінде елімізде ғалымдардың саны 22 мыңнан асатынын жеткізді.

Өз кезегінде Әл-Фараби атын­дағы ҚазҰУ ректоры құр­метті қонақтарды қарсы ала отырып, оқу ордасында жас ғалымдарға жағдай жасау және олардың мүмкіндіктерін арт­тыру бойынша жүйелі жұ­мыстар жүргізіліп жатқанын атап өтті.

«Бүгінде ҚазҰУ-да 40 жасқа дейінгі 300-ден астам жас ғалым жұмыс істейді. Көпшілігі әлемнің жетекші университет­те­рі мен орталықтарында ғы­лыми тағылымдамадан өтті. Университетте Жас ғалымдар кеңесі нәтижелі жұмыс атқарып келеді. ҚазҰУ-ға зерттеу уни­вер­ситеті мәртебесі беріл­ген­нен бастап университеттік ғы­лым­ды дамытуға ерекше көңіл бө­лініп келеді. Университет ғы­лымынан түскен табыс соң­ғы үш жылда екі есеге артып, 8,5 млрд теңгені құрады», – деді Жансейіт Түймебаев.

Кездесуде ғалымдар сөз сөй­леп, ғылымды дамытуға ба­ғытталған бірқатар ұсыныс­тарын жеткізді.

Света Әбілғазықызы