Физика-математика ғылымдарының докторы, профессор, Қазақстан Республикасы Ұлттық ғылым академиясының академигі, Қазақстан Республикасы білім беру ісінің құрметті қызметкері.
Рысқұл Ойнаров 1947 жылы 26 ақпанда Қызылорда облысы Қазалы ауданы Көл-Арық ауылында (қазіргі Көларық ауылдық округіне қарасты Ахтан батыр ауылы) дүниеге келген.
1964 жылы Сольтрест (қазіргі Жақсықылыш) ауылындағы орта мектепті бітіріп, СМ.Киров атындағы Қазақ мемлекеттік университетінің механика-математика факультетіне оқуға түседі.
1969 жылы Рысқұл Қазақ мемлекеттік университетін үздік бітірген.
1972 жылы Қазақ мемлекеттік механика-математика университетінде математикалық талдау кафедрасының ассистенті, кейін Қазақ КСР Ғылым академиясының Математика және механика институты зертханасының аға инженері болып жұмыс істеді.
1979 жылдың қараша айынан бастап Рысқұл Ойнаров Қазақ КСР Ғылым академиясы Математика және механика институтының қолданбалы талдау зертханасының қызметкері атанады. Мұнда 20 жылдан астам еңбек етіп, аға инженерден зертхана меңгерушісіне дейін көтеріліп, қазақ математикасының қалыптасуына көп еңбек сіңіреді.
1981 жылы Р.Ойнаров «Урысон типті сызықты емес интегралдық операторлардың үздіксіздігі және Липшицтігі» атты кандидаттық, ал 1994 ж. – «Интегралдық және дифференциалдық операторлардың салмақтық бағалары» тақырыбында докторлық диссертация қорғайды.
Р.Ойнаровтың интегралдық операторлардың салмақтық бағалаулар теориясы нәтижелерінің арқасында әлемдік математикалық әдебиетке «Ойнаров ядросы» және «Ойнаров шарты» терминдері енді.
2005-2006 жж. Р.Ойнаров жетекшілік ететін қазақстандық команда INTAS халықаралық бағдарламасының «Функциялық кеңістіктер және дербес дифференциалдық теңдеулерге қосымшалары» грантын жеңіп алып, профессор «Weighted inequalities for differential and integral operators and interpolation of function spaces» тақырыбына жетекшілік етті.
Академик Р.Ойнаров импакт-факторы жоғары «Journal of mathematical inequalities» және «Journal of mathematical denqualities» атты халықаралық ғылыми журналдардың редакциялық алқасы мүшесі. «Eurasian Mathematical Journal» ғылыми журналын шығаруды алғашқы ұйымдастырушылардың бірі.
Оның жетекшілігімен екі докторлық, 11 PhD, 15 кандидаттық және 50-ден астам мaгистрлік диссертация, соның ішінде Лулеа технологиялық университетінде (Швеция) алты PhD және Падуа университетінде (Италия) екі PhD диссертация, қорғалды.
Р.Ойнаров 100-ге жуық түпнұсқалық ғылыми еңбектің (оның 20-ға жуығы шетелде жарияланған) авторы, «ЕҰУ хабаршысы», «Eurasian Mathematical Journal» журналдары редакцияларының, Л.Н.Гумилева атындағы ЕҰУ Ғылыми кеңесінің мүшесі.
Профессор Р.Ойнаров «Қазақстан Республикасы ғылымын дамытуға сіңірген еңбегі үшін» төсбелгісімен, «Қазақстан Республикасы білім беру ісінің құрметті қызметкері» белгісімен, Қазақстан Республикасы Президентінің Құрмет грамотасымен және «Құрмет» орденімен марапатталған.