Студенттерге Мемлекеттік рәміздер тарихы баяндалды

Әл-Фараби атындағы ҚазҰУ-дың тарих факультетінде «Қазақ геральдикасының бастауы және ҚР Мемлекеттік рәміздері» тақырыбына арналған дөңгелек үстел өтті.

Факультет деканы, профессор Досбол Байғонақов рәміздердің тарихи сабақтастығы, мемлекеттілік идеясы туралы айтып, мемлекеттік нышандар қоғамның ұлттық және жалпыадамзаттық құндылықтарға топтасуы мен ұмтылысын айшықтайтынын атап өтті. «Мемлекеттік рәміздерде қазақ тарихы, мәдениеті мен философиясының негізгі белгілері көркем түрде бейнеленген», – деді Д.Байғонақов.

Дөңгелек үстел барысында Археология, этнология және музеология кафедрасының меңгерушісі, профессор Бибізия Қалшабаева қазақ геральдикасының тарихына назар аударды. Қазақстан тарихы кафедрасының меңгерушісі, ҚР ҰҒА академигі Берекет Кәрібаев дәстүрлі қазақ қоғамындағы көне таңбалар мен басқа да белгі-нышандарды атап өтті. Профессорлар Тәттігүл Қартаева мен Рыскелді Мырзабекова елтаңбаның сюжетін, ою-өрнектердің мәні мен сәнін және мемлекеттік рәміздердің өзге де атрибуттарына тоқталды. Дөңгелек үстелге қатысушылар студенттердің сұрақтарына жауап беріп, батылдық пен батылдықтың символы болған тотемдік жануарлар жайлы, таңбалар, түрлі белгілер және т.б. әртүрлі нысандар туралы әңгімеледі.

Барлық өңірлер мен қалаларда 4 маусымда елдің Мемлекеттік рәміздер күні атап өтіледі. Бұл күні Қазақстанның тәуелсіздігі мен бірегейлігін бейнелейтін мемлекеттік рәміздері алғаш рет бекітілді. Егемендіктің мызғымас негіздері – Ту, Елтаңба және Әнұран әлемге Қазақстан Республикасы деп аталатын мемлекетті таныстырды.

Әл-Фараби атындағы ҚазҰУ-дың Баспасөз қызметі