Ақдениз университетіне сапар

Физика-техникалық факультетінің деканы Бейсен Н.Ә. Түркия, Анталия қаласы, Думлупынар бульвары 07070 Коньяалти кампусында Ақдениз университетінің профессоры, ядролық физика кафедрасының меңгерушісі Исмаил Бозтосунға қонаққа барды.

Академиялық және ғылыми байланыстарды орнату мақсатындағы сапар барысында Бейсен Н.Ә. Ақдениз университетінің кампусында, ғарыштық ғылым және технологиялар факультетінің, химия факультетінің, математика факультетінің, биология факультетінің және физика факультетінің зертханаларында болды.

Физика факультетінің деканы, профессор Мұстафа Алкан және Ядролық физика кафедрасының меңгерушісі Исмаил Бозтосунмен бірге ғылыми және академиялық тәжірибе алмасу аясында физика факультетінің профессорларымен ғылыми семинарлар мен практикумдар өткізілді.

Физика факультетінің үйлестірушілері мен білім беру бағдарламаларын әзірлеушілері және деканы профессор Мұстафа Алканның қатысуымен өткен дөңгелек үстел барысында бакалавриат пен магистранттар, сонымен қатар ҚазҰУ оқытушылары үшін академиялық ұтқырлық және ғылыми тағылымдамадан өту мүмкіндіктері талқыланды.

Сапар барысында профессор Исмаил Ботосунның ғылыми тобымен ядролық физика және теориялық физика саласында бірлескен ғылыми зерттеулер жүргізу мүмкіндігі және Ақдеңіз университетінің физика факультеті мен ҚазҰУ аль-Фараби атындағы физика факультеті арасында өзара түсіністік туралы меморандумға қол қою мүмкіндігі қарастырылды және талқыланды.