ҚазҰУ ректоры Астанада Цукуба университетінің президентімен кездесті

Әл-Фараби атындағы Қазақ Ұлттық университетінің Басқарма Төрағасы – Ректоры Жансейіт Түймебаев Цукуба университетінің президенті Нагата Кёсукэмен кездесті. 

Кездесу Астанада ұйымдастырылып жатқан Орталық Азия мемлекеттері басшыларының VI Консультативтік кездесуі және «Орталық Азия + Жапония» диалогының бірінші саммиті аясында өтті.

Тараптар екі университет арасындағы ынтымақтастықты дамыту бағыттары бойынша пікір алмасты. Атап айтқанда, біріккен сейсмологиялық орталық құрып,  жер сілкінісіне қатысты жапондық ғалымдардың тәжірибесін елімізге енгізу мәселесі талқыланды.

ҚазҰУ тарапынан  табиғи шөптерден дәрі-дәрмек жасау бойынша біріккен орталық құру және қазақ, жапон тілдік курстарын ұйымдастыру ұсынылды. Бұл бастама алдағы уақытта жапон жастарының қазақ тілін үйренуге деген қызығушылығын арттыруға жол ашпақ. Биыл Цукуба университетінің екі студенті ҚазҰУ-да қазақ тілін үйренуде.

Тараптар сонымен қатар «Кампустағы кампус» жобасы аясында атқарылатын бірлескен іс-шаралар жоспарын талқылады. Кездесу соңында Цукуба университетінің президенті Нагата Кёсукэ бастаған ғалымдар делегациясы 2024 жылдың қазан айының соңында ҚазҰУ-ға арнайы жұмыс сапарымен келетін болып келісілді.

Әл-Фараби атындағы ҚазҰУ-дың Басапсөз қызметі