ҚазҰУ докторанты Кадир Хас университетінде тағылымдамадан өтті

Әл-Фараби атындағы ҚазҰУ-дың PhD докторанты Меруерт Таукебаева Түркия мемлекетінің Кадир Хас университетінде (Kadir Has University) ғылыми тағылымдамадан өтіп қайтты.

Тағылымдама аясында жас ғалым Кадир Хас университетінің ғылыми кітапханасының мәліметтер қорымен танысып, диссертация тақырыбына қатысты ғылыми зерттеу жүргізді. Оның ғылыми жұмысының тақырыбы «Имантау-Шалқар курорттық аймағының туристік-рекреациялық әлеуетін бағалау» деп аталады. Аталған тақырып аясында жан-жақты зерттеу жасаған жас ғалым ESRI компаниясы ұйымдастырған 16 сағаттық Managing Geospatial Data in ArcGIS курсына да қатысып, арнайы сертификат иеленген.

Бүгінде Кадир Хас университеті қолданбалы және жобалық білім берудің жаңа моделін әзірлеу арқылы жоғары сапалы зерттеулерді, сондай-ақ жоғары стандарттарға сай құзыретті студенттерді қалыптастыруды мақсат ететін зерттеу университеті саналады.

Негізгі бағдарлама дәстүрлі білім беруден бөлек, студенттерді қоғамның барлық салаларында қажет болатын шығармашылық және сыни сұрақ қою дағдыларына бейімдеуге бағытталған. 2019 жылдан бастап олар жаңа білім беру моделі деп аталатын білім беру жүйесімен әлемнің кез келген жерінде жұмыс істей алатын түлектерді даярлауды мақсат етеді. Білім ордасында өнер және дизайн, коммуникация, экономикалық және әкімшілік ғылымдар, инженерлік және жаратылыстану ғылымдары, құқық сынды факультеттер бар. Сондай-ақ жоғары оқу орны озық технологиялық жабдықтар мен зияткерлік ресурстарға қолжетімділікті де қамтамасыз етеді.

Әл-Фараби атындағы ҚазҰУ-дың Баспасөз қызметі