Аризона университетімен табысты байланыс

Әл-Фараби атындағы Қазақ ұлттық университетіне Аризона штатының мемлекеттік университетінің делегациясы келді.

Әл-Фараби атындағы ҚазҰУ Басқарма Төрағасының орынбасары – бірінші проректор м.а. Еркін Дүйсенов қонақтарға университеттің қызметі, инфрақұрылымы және жетістіктері туралы баяндады.

Еркін Ерманұлы ҚазҰУ АҚШ-тың 19 университетімен және ұйымдарымен тығыз қарым-қатынас орнатқанын атап өтті. Академиялық ұтқырлық бағдарламасы аясында 2023-2024 жылдары АҚШ-тан төрт оқытушы мен 53 студент ғылыми тағылымдамадан өтуге және ғылыми-зерттеу жұмыстарын орындау мақсатында ҚазҰУ-ға келді. Өткен оқу жылында ҚазҰУ-дың 12 оқытушысы мен 29 студенті АҚШ-тың жоғары оқу орындарында тәжірибелік оқуда болды.

ҚазҰУ Халықаралық білім беру жөніндегі америкалық кеңестермен тығыз жұмыс істейді және өзара түсіністік туралы меморандумға 2014 жылы қол қойылды, 120-дан астам америкалық студент филология факультетінің «Флагман» бағдарламасы бойынша тілдік бағдарламасына және халықаралық қатынастар факультеті жанындағы RLASP бағдарламасына 300 студент қабылданды.

ҚазҰУ-да АҚШ жоғары оқу орындарының төрт профессоры сабақ берді. 2023 жылы «Болашақ» бағдарламасының «500 ғалым» стипендиялық бағдарламасы бойынша университеттің 41 қызметкері шетелдік жоғары оқу орындарына барды, оның ішінде 12 қызметкер АҚШ-тың 8 жоғары оқу орнында болды.

ҚазҰУ-дың Басқарма Төрағасы – Ректор Жансейіт Түймебаевтың АҚШ-қа жұмыс сапары барысында Пенсильваниямен ынтымақтастық туралы меморандумға қол қойылды.

Сөз соңында бірінші проректор  АҚШ делегациясы өкілдеріне сапары үшін алғыс айтып, университеттер ғылымды дамыту мақсатында ынтымақтастықтың басым бағыттарын айқындайтынына сенім білдірді.

Аризона төтенше жағдайлар департаментінің директоры Гейб Лавин 1993 жылы басталған Аризона штатының Қазақстанмен ынтымақтастығы туралы айтты. Мемлекеттік әріптестік бағдарламасы аясында Аризонаға қазақстандық делегациялар жиі барады. Гейб Лавин сонымен қатар 600 мыңға жуық студенті бар Аризона штатының ең ірі университеті туралы әңгімелеп, ынтымақтастықты дамытуға қызығушылық танытты.

Кездесу барысында тараптар ғылым мен білім берудің түрлі салаларында өзара тиімді ынтымақтастықты дамыту мәселелерін талқылады.

Әл-Фараби атындағы ҚазҰУ-дың Баспасөз қызметі