ҚЫТАЙТАНУ КАФЕДРАСЫ 1 КУРС ОҚУШЫЛАРЫН ҚАРСЫ АЛУ РӘСІМІН ӨТКІЗДІ

2024 ж. 25 қыркүйек күні қытайтану кафедрасының басшылығы және оқытушылары биыл оқуға түскен бакалавр, магистрант, докторанттарды қарсы алу рәсімін өткізді. Бұл шара «Тұрақты даму мақсаттары (ЦУР)» негізінде жүзеге асырылатын іс-шаралар жоспары негізінде "Сапалы білім" бағыты бойынша жүзеге асырылды.  Биыл кафедраға «шетел филологиясы»,  «шығыстану» және «аударма ісі» мамандықтары бойынша отандық және шет елден келген 100-ден аса оқушы қабылданған болатын. Жаңа студенттермен кездесу барысында кафедра жетекшісі Е. Керімбаев және осы іс-шараның басты ұйымдастырушысы, кафедраның қауымдастырылған профессоры Дәулет Ф.Н. факультет табалдырығын алғаш аттаған оқушыларды кафедрамен таныстырды және оқитын мамандықтары бойынша жалпы мағлұматтар беріп кетті. Кездесу кезінде аударма ісі мамандығы бойынша оқып жатқан 2 курс магистранттары Ә. Сәденова, Б. Дәңкей, І. Басар және Ван Юйтин, Ван Линлин жаңа оқушыларға қытай тілі мен мәдениетіне байланысты қызықты ақпараттар берді. Іс-шара барысында  қазақ, қытай тілдерінде өлеңдер айтылды, сонымен бірге жаңа оқушылар 2 курс магистранттары дайындап келген қытай халқының дәстүрлі тағамдарынан дәм татты. Қытайтану кафедрасы оқытушылар саны және кафедрада жұмыс жасайтын елімізге белгілі ғалымдар саны жағынан шығыстану факультетінің маңдайалды кафедрасы. Қытайтану кафедрасы - Әл-Фараби атындағы ҚазҰУ жүйесіндегі мамандандырылған ғылыми-әдістемелік бөлім және инновациялық әдістер негізінде қытай тілін жетік меңгерген жоғары сапалы қытайтанушы мамандарды дайындайтын кешенді ғылыми-зерттеу және оқыту орталығы.  Бүгінгі таңда кафедра алдында өзінің негізі қаланған кезінен бастап жинақталған тәжірибені сақтау және тереңдету, қалыптасқан ұжымды сақтау және жас мамандарды жұмысқа тарту сияқты күрделі міндеттер тұр. Кафедра қызметкерлері қытайтанушы мамандарды дайындау барысында көп жылдар бойы қалыптасқан жоғары деңгейді ұстап тұру жолында, ҚазҰУ ғылыми-зерттеу және педагогикалық мектебінің сабақтастығын сақтауда аянбай еңбектенуде.

Дәулет Ф.Н.