Korea Foundation делегациясы Қиыр Шығыс кафедрасына жолықты

2024 жылдың 23 қыркүйегінде әл-Фараби атындағы ҚазҰУ Шығыстану факультетінің Қиыр Шығыс кафедрасына Корея Қорының (Korea Foundation) делегациясы Жаһандық білім беру институтының директоры Кибер Хангук Шет тілдер университеті (Корея Республикасы), корей тілі департаментінің деканы, профессор Ли Мин Ву мен Жаһандық білім беру институтының жетекшісі, корей тілі кафедрасының профессоры Джин Джон Ран жұмыс сапарымен келді. Шетелдік қонақтармен кездесуді Қиыр Шығыс кафедрасының меңгерушісі, PhD, доцент А.Б.Абаған, сонымен қатар кафедраның профессорлық-оқытушылық құрамы жүргізді.

Әңгімелесу барысында университеттер арасындағы ынтымақтастық меморандум және корей тілі кафедралары арасындағы стратегиялық серіктестікке қатысты бірқатар мәселелер талқыланды. Екі жақ Қиыр Шығыс кафедрасына жұмыс істеу үшін Оңтүстік Кореядан шақырылған профессордың, корей тілінің маманның келуін талқылады. Корея Қоры тарабынан шақырылған профессордың келуі кафедра үшін ерекше мүмкіндік болып табылады. Студенттер айтылымды жаттықтырып, сөйлеу мәнерін қабылдап, шешендік өнерің шыңдай алады. Корея Қоры корейтануды дамытуға және корей тілін оқытуды жаңа деңгейге көтеруге бірегей мүмкіндік береді.

Күн тәртібінде сондай-ақ Кибер Хангук шет тілдер университетінің Жаһандық білім беру институтының бакалавр студенттері мен магистранттарға арналған іскерлік тіл курсы мен корей тілін деңгейін анықтауға арналған халықаралық тестке (TOPIK) дайындық онлайн курстарын өткізу мәселесі қаралды. Сондай-ақ, Қиыр Шығыс кафедрасының оқытушылары мен Кибер Хангук шет тілдері университетінің Жаһандық білім беру институтының оқытушылары бірігіп оқыту тәжірибесімен алмасу мүмкіндігі талқыланды. Болашақта магистранттар мен докторанттарға арналған жоғары импакт-факторы журналдарға бірлесіп мақалалар жазу жоспарлануда.

Қонақтар Қиыр Шығыс кафедрасы оқытушыларының жұмысымен, оқу кабинеттерінің жабдықталуымен танысып, жемісті ынтымақтастық пен алдағы уақытта бірлескен жұмыстарға сенім білдірді.

Исмаилова С.Ж., Қиыр Шығыс кафедрасының аға оқытушысы