Ғылыми-техникалық жобалар бойынша гранттық қаржыландыруға арналған конкурсқа байланысты ғылыми семинар

ЖОО дейінгі дайындық кафедрасында ТДМ 17 аясында ғылыми және ғылыми-техникалық жобалар бойынша гранттық қаржыландыруға арналған конкурстың талаптары талқыланған іс-шара өтті. Бұл маңызды кездесуді кафедраның ғылыми инновациялық қызмет және ғылыми байланыстар жөніндегі кафедра меңгерушісінің орынбасары, PhD Амангелді Нұргүл өткізді. Іс-шараның негізгі мақсаты – ғылыми гранттық қаржыландыруға өтініш берушілерге конкурсқа қатысу талаптарын жан-жақты түсіндіру болды.
         Амангелді Нұргүл өз сөзінде гранттық қаржыландыруға арналған конкурстың басты мақсаты Қазақстанның ғылыми және экономикалық дамуына үлес қосатын инновациялық жобаларды қолдау екенін атап өтті. Конкурсқа ұсынылатын жобалардың өзектілігі мен олардың еліміздің әлеуметтік және экономикалық мәселелерін шешудегі рөлі ерекше маңызға ие. Конкурстың тағы бір маңызды талабы – жобаның ғылыми жаңашылдығы мен инновациялылығы. Амангелді Нұргүл бұл аспектінің ғылымның дамуына ықпал ететін жаңа технологиялар мен әдістерді енгізуге бағытталуы қажет екенін ерекше атап өтті. Әрбір жоба ғылыми жаңалық алып келуі тиіс, ал бұл оның конкурстағы мүмкіндіктерін арттырады.
         Жоба тек ғылыми құндылықпен шектелмеуі керек, оның әлеуметтік маңыздылығы да жоғары болуы тиіс. Амангелді Нұргүлдің айтуынша, қоғамның өзекті мәселелерін шешуге бағытталған жобалар гранттық қолдауға ие болуы үшін ерекше назарға алынады. Сонымен қатар, әрбір жоба бойынша бөлінген қаражаттың тиімді пайдаланылуы мен қаржылық есептіліктің дұрыс орындалуы қатаң талаптардың бірі болып саналады. Қаржының мақсатты түрде жұмсалуы және оның толық есебінің берілуі жобаның сәтті жүзеге асуының кепілі.
        Кездесу барысында қатысушылар гранттық қаржыландыруға өтінім беру талаптары туралы толық ақпарат алып, жоба дайындау кезінде қандай мәселелерге назар аудару керектігі жайлы кеңестер алды. Амангелді Нұргүлдің айтуынша, гранттық қаржыландыру конкурсына қатысу жас ғалымдар мен тәжірибелі зерттеушілер үшін үлкен мүмкіндік. Ол қатысушыларға жоба әзірлеу кезінде барлық талаптарды қатаң сақтау қажеттігін ескертті. Жобаның ғылыми және әлеуметтік құндылығын нақты көрсетіп, құжаттарды дұрыс рәсімдеу – конкурсқа қатысудың басты шарттары.
         Қорытындылай келе, Амангелді Нұргүл өткізген бұл кездесу ғылыми қауымдастық үшін өте пайдалы болды. Ғылыми-зерттеу жұмыстары мен жобаларды қолдау арқылы Қазақстанның ғылыми әлеуетін дамытуға бағытталған гранттық қаржыландыру конкурсы елімізде ғылымның дамуына жаңа мүмкіндіктер ашатыны сөзсіз.