ТДМ-4 ҚазҰУ-да бірінші курс студенттерін қабылдау кеші өтті

28 қыркүйекте Əл-Фараби атындағы Қазақ Ұлттық Университетінде (ҚазҰУ) дəстүрлі бірінші курстарды қабылдау кеші өтті. Іс-шараның ашылу салтанатында университеттің ректоры  Жансейіт Түймебаев сөз сөйлеп, студенттерге алдағы оқу жылында сəттілік тіледі. Ол ҚазҰУ-дың Қазақстандағы жоғары білім беру жүйесіндегі беделі мен жетістіктерін атап өтіп, жаңа буын студенттерін университеттің дəстүрлерін жалғастыруға шақырды.

Кеш барысында түрлі шығармашылық топтар өнер көрсетті. Соның ішінде университеттің студенттерінен құралған вокалды жəне би топтары көпшіліктің көңілін көтерді. Университеттің белсенді ұйымдары өздерінің өнерін паш етті. Кештің көркін арттырған ерекше элементтердің бірі – университеттің 90 жылдық мерейтойына арналған əуе шары болды. Сонымен қатар, мерекелік от шашу да ұйымдастырылды. Бірақ ол кешкі сағат 17:00-де атылғандықтан, тек аспандағы түтіндер ғана көрінді. Кеште танымал əнші Əділет Жауғашар да өнер көрсетті. Шараның ең есте қаларлық сəті – 800 студенттің бірлесіп флешмоб билеуі болды. Қабылдау кеші университеттің жаңа студенттері үшін қызықты əрі есте қаларлық сəттермен толы болды. Олар ҚазҰУ-дың дəстүріне еніп, білім алу жолында алғашқы қадамдарын жасады.