Астрофизика мәселелері талқылануда

Әл-Фараби атындағы Қазақ ұлттық университетінде жұлдызды астрофизика саласына арналған Hot Stars: Life with Circumstellar Matter атты халықаралық ғылыми конференция басталды.

Оқу ордасының 90 жылдығына орай ұйымдастырылған ауқымды іс-шараға АҚШ, Канада, Ресей, Қытай, Үндістан және т.б. елдерден келген 50-ден астам шетелдік ғалым-сарапшылар қатысып, өзара пікір алмасты.

Әбу Насыр әл-Фарабидің тарихи мұрасы, оның қазіргі заманғы бақылау астрономиясының қалыптасуындағы философ және ғалым ретіндегі баға жетпес үлесі ерекше рөл атқарады.

Конференцияға қатысушылар әл-Фарабидің аспан денелері қозғалысы туралы білімнің математикалық негіздерін қалыптастыру және астрономияның философия саласын дамытуға қосқан үлесі жайлы атап өтті.

Шара барысында ғалымдар жақын орналасқан газ-шаңды қабығы бар ыстық жұлдыздар саласындағы заманауи зерттеулер туралы ақпараттармен  бөлісіп, талқылау жұмыстарын жүргізді.

Айта кетейік, физика-техникалық және механика-математика факультеттері  ұйымдастырып отырған іс-шара В.Г.Фесенков атындағы Астрофизика институты мен Инженерлік және іргелі ғылымдар институты, сондай-ақ ҚазҰУ мен Назарбаев университетінің қолдауымен өтуде.

Халықаралық конференция қазанның 19-ына дейін жалғасады.

Әл-Фараби атындағы ҚазҰУ-дың Баспасөз қызметі