ТДМ-4. Жоғары білім саласындағы медиа ақпараттық сауат

2016 жылы ұйымдастырылған I Халықаралық Күзгі медиа мектеп ЮНЕСКО-ның журналистика және коммуникация кафедрасының 20жылдығымен тұспа-тұс келген еді. Жаһандық медиа және ақпараттық сауат апталығы аясында өткізілетін Күзгі мектепке әр жылдары АҚШ, Еуропа, Ресей елдерінің медиасаласындағы практик-мамандар, профессор, ғалымдар жас журналистерге, PR мамандарға, студенттерге дәріс оқып, практикалық сабақтар жүргізді. Мектепке Ауғаныстан, Иемен, Өзбекстан, Қырғызстан елдерінен жас мамандар қатысып, шеберліктерін шыңдады. 

Әлем цифрлық форматқа көшті. Цифрлық дәуірдің, жаңа технологиялардың мүмкіндіктерімен қатар, кибер қауіп-қатерлер, цифрлық теңсіздік т.б. мәселелер атойлап бас көтерді. Осы орайда білім беру саласындағы ақпараттық сауаттың мәні мен рөлі жоғары. Медиа ақпараттық сауат - ақпарат пен медиаөнімдерді тиімді пайдалану, сыни бағалап, дұрыс түсініп, қабылдау, сараптау, сауатты жасап, тарату. Осы машықтарды, құзіреттіліктер мен біліктілікті арттыру, қауіпсіз, әділетті цифрлық қоғам  құруға атсалысу – Күзгі мектептің мақсаты. 

Биылғы Күзгі мектеп гибридтік форматта өтті. Журналистика факультетінің деканы Темірғали Көпбаев медиамектеп қатысушыларына сәттілік тілеп, қауіпсіз, әділетті, инклюзивті қоғам құрудағы жаһандық апталықтың маңызына тоқталды. 

ЮНЕСКО халықаралық ұйымы 2007 жылдан бері медиа ақпараттық, цифрлық және технологиялық сауатты арттыру мақсатында кешенді  жұмыс атқарып келеді. Биылғы жаһандық апталық цифрлық кеңістік пен цифрлық платформалар аясындағы көпжақты ынытмақтастыққа арналды. ЮНЕСКО Кластерлік бюросының коммуникация және ақпарат бөлімінің маманы Сергей Карпов тұрақты дамудың 16-шы мақсатын атап, медиа ақпараттық сауаттың тұрақты даму мақсаттарын дамытып, оқу сапасын арттырудағы ықпалын айтты.

«Түркітілдес журналистер қоры» ҚҚ президенті Нәзия Бисенова қордың журналистика факультетімен бірге атқарған іс-шараларға тоқтала келіп, Күзгі мектептің кәсіби біліктілікті арттырудағы рөлін жоғары бағалады, тыңдаушыларға интервью жанрында мазмұнды дәріс оқыды.

Медиа мектеп барысында сапалы медиаконтент жасап, сыни бағалау, сапалы конетентті қолдануға байланысты практикалық сабақтар өтті.

«Интерньюс-Қазақстан» халықаралық ұйымының өкілі Бэлла Орынбетова сторителлинг форматында қызықты кейстермен мəтін жазу техникасын, сторителлинг контент жасауды үйретті. "Қазақстанның орнықтылық қоры" АҚ Сыртқы байланыстар қызметінің бас менеджері Айбар Олжай дағдарысқа қарсы коммуникацияның міндеттері мен әдіс-тәсілдерін,  креативті шешу жолдарын әңгімеледі. Медиамектеп тыңдаушылары «Эйр Астана» АҚ корпоративтік коммуникациялар менеджері Тлек Абдрахимов пен «Astana Group»корпоративтік коммуникациялар директоры Ляззат Альжанованың дәрістерін, практикалық кейстерінқызыға тыңдады.

Күзгі мектепте сондай-ақ Қырғыз-Ресей Славян (Қырғызстан) университетінің Жарнама және қоғаммен байланыс кафедрасының меңгерушісі Гульмира Джунушалиева, Пенза мемлекеттік университетінің (Ресей) доценті Галина Зуева,Дебрецен университетінің PhD докторанты(Венгрия), Қазақстанның Венгриядағы DOSZ елшісі Назира Әбдінасыр т.б. «Посткеңестік Орталық Азиядағы жаһандық субъектілердің имиджі», «Медиа маркетингтегі психологиялық әсерлер» т.б. тақырыптарда дәріс, практикалық сабақтар жүргізді.

Күзгі мектеп жұмысы онлайн форматта 31 қазанға дейін жалғасады.