Vivo компаниясымен тәжірибе алмасу

Farabi International Business School командасы Қытайдағы мобильді смартфондар нарығы көшбасшыларының бірі Vivo компаниясының жергілікті кеңсесіне барды. Бас директор Чжан Гао мырзаның басшылығындағы компания өкілдері қонақтарды қарсы алып, халықаралық нарықтағы жұмыс тәжірибелерімен бөлісті.

Кездесу барысында Vivo компаниясының сату жөніндегі директоры Азиз Мұратов Қазақстан нарығындағы компанияның жетістіктері туралы әңгімелеп, аймақтағы брендтің даму стратегиясы мен негізгі мақсаттарын егжей-тегжейлі баяндады. Оның презентациясы бәсекелестік жағдайында жоғары нәтижелерге жету әдістері туралы құнды түсініктер берді.

HR және әкімшілік мәселелер жөніндегі директор орынбасары Әлия Сүлейменова 2019 жылы нарыққа шыққан сәттен бастап Қазақстандағы компанияның жұмысы туралы баяндады. Ол Vivo компаниясы құнды қызметкерлерді қалай ұстап тұратынын және жаңа таланттарды қалай тарта алатынын түсіндірді. Бизнес-мектеп командасы компанияның қызметкерлерді ынталандыру жүйесіне ерекше қызығушылық танытты. Бұл жүйе қолайлы корпоративтік мәдениетті қалыптастыруға арналған бірегей тәсілдерді қамтиды. Осы әдістерді бизнес-мектеп тәжірибесіне енгізу мүмкіндігі талқыланды.

Кездесу барысында университет пен Vivo компаниясы арасындағы ынтымақтастық бағыттары да қарастырылды. Әл-Фараби атындағы Қазақ ұлттық университетінің даму стратегиясына сәйкес жүзеге асырылатын бірлескен жобалар жоспары құрылды.

Бұл кездесу жетекші халықаралық компаниялармен серіктестік байланыстарды нығайту жолындағы маңызды қадам болды. Сондай-ақ Farabi International Business School-дың бизнес-ортаға белсенді ұмтылысына жол ашып,  нарықтың нақты қажеттіліктеріне негізделген білім беру бағдарламаларын дамытуға және студенттер мен оқытушылардың кәсіби ортаға ену мүмкіндіктерін жасауға ықпал етеді.

Әл-Фараби атындағы ҚазҰУ-дың Баспасөз қызметі