Жоба "Golden Hour": Төрағалықты табыстау және жаңа мүшелердің дебюті

16 қараша 2024 жылы механика-математика факультетінің Қызыл залында "Golden Hour" жобасы өтті. Бұл шараны әл-Фараби атындағы ҚазҰУ Студенттер Сенаты Механика-Математика факультеті Маслихаты ұйымдастырды. Аталған іс-шарада Маслихат төрағасы Қадырболатұлы Ринат өз қызметін аяқтап, төрағалықты Сейт Мусабекке тапсырды. Сонымен қатар, Сенаттың бірінші курс студенттері өздерінің алғашқы жобасын сәтті таныстырып, студенттер қауымдастығында өз орнын бекітті.

Студенттер Сенаты университеттің мәдени және спорттық өмірін ұйымдастыруда үлкен рөл атқарады. Ол студенттерге рухани, мәдени және шығармашылық өсуге мүмкіндік береді. "Golden Hour" жобасы осы бағыттағы игі бастамалардың бірі болды.

"Golden Hour" бағдарламасында:

• Қызықты қойылымдар көрсетіліп, көрермендердің көңілінен шықты;
• Факультеттер арасында шығармашылық "батл" өтті;
• Көркем сөз оқуларымен және би өнерімен ерекшеленді

Жоба университеттің маңызды құндылықтарын дәріптеп, студенттер арасындағы достық пен бірлікті нығайтты.

Тұрақты даму мақсаттарымен байланыс:

"Golden Hour" жобасы тікелей Тұрақты даму мақсаттарының 4-ші (Сапалы білім) және 11-ші (Тұрақты қалалар мен қоғамдар) мақсаттарымен байланысты. ТДМ 4 барлық адам үшін инклюзивті және сапалы білім беруді және өмір бойы білім алу мүмкіндіктерін қамтамасыз етуге бағытталған. Бұл жоба студенттердің шығармашылық қабілеттерін дамытуға ықпал етіп, университеттің мәдени өміріне қатысуға тең мүмкіндіктер ұсынады. Ал ТДМ 11 тұрақты және инклюзивті қоғамдар құруға назар аударады, және "Golden Hour" жобасы студенттер арасындағы достық пен бірлікті нығайту арқылы университеттің тұрақты және қолдаушы қауымдастығын қалыптастыруға үлес қосады.

Қызмет ауыстыру сәті

Кеш соңында Қадырболатұлы Ринат өз қызметін абыроймен аяқтап, төрағалықты Сейт Мусабекке салтанатты түрде табыстады. Қадырболатұлы Ринат жаңа төрағаға жылы лебізін білдіріп, сәттілік тіледі. Өз кезегінде, Сейт Мусабек Сенаттың дәстүрлерін жалғастыратынын және жаңа биіктерге жетелейтінін атап өтті.

Бұл шара әл-Фараби атындағы ҚазҰУ-дың белсенді студенттерінің күш-жігерін айқын көрсетіп, университет қауымдастығында ұмытылмас әсер қалдырды. Жаңа төрағаға табыс пен сәттілік тілейміз!