Инвесторлармен әріптестік жалғасады

Әл-Фараби атындағы Қазақ ұлттық университетінің Басқарма Төрағасы – Ректор Жансейіт Түймебаев «Eclipse Invest Group» ЖШС директорлар кеңесінің төрағасы Ту Бинмен кездесті.

Жүздесу барысында тараптар ынтымақтастық орнату жолдарын талқылап, бірқатар мәселелерді ортаға салды.

ҚазҰУ басшысы меймандарға әлемге әйгілі компаниялармен бірлесіп жұмыс істеудегі университет тәжірибесімен бөлісті.

«Университетте Samsung, Hewlett-Packard, Cisco, Koniсa Minolta, Fujitsu, Alcatel, Microsoft, Huawei, ZTE компаниялары табысты жұмыс істеуде. Аталған жетекші компаниялармен бірлесіп оқытушы-профессорлар құрамы мен студенттердің біліктілігін арттыруға бағытталған бірқатар іс-шаралар өткізілді. Оқу ордасына Орталық Азиядағы ең қуатты суперкомпьютерлер әкелініп, орнатылып жатыр.  ҚазҰУ ғалымдары әзірлеген көптеген ғылыми жобалар бар. Сондықтан  инновациялық жобаларды коммерцияландыруда университет жетекші компаниялармен бірлесіп жұмыс істеуге мүдделі», – деді университет басшысы.

Өз кезегінде Ту Бин жылы қабылдағаны үшін оқу орнының ректорына ризашылығын білдіріп, ҚазҰУ-дың жетістіктерін жоғары бағалады. Құрметті қонақ өз сөзінде серіктестік орнату маңызды қадам болатынын  тілге тиек етті. Сондай-ақ бірлескен жобалар бойынша жұмысты одан әрі жандандыруға дайын екенін жеткізді.

Кейін «Eclipse Invest Group» ЖШС директорлар кеңесінің мүшелері  «Farabi Hub» инновациялық өнімдер мен жоғары технологиялық жобалар орталығына барып, білім ордасының ғылыми инфрақұрылымымен танысты. Мұнда меймандарға университет ғалымдары әзірлеген инновациялық жобалардың нәтижелері көрсетілді.

Әл-Фараби атындағы ҚазҰУ-дың Баспасөз қызметі