Тарихи мұраны фотофиксациялау және музейлік фотолаборатория құру: Оңғарбек Алхаровтың дәрісі

Тұрақты даму мақсаттарының (ТДМ) №17 "Мақсатқа қол жеткізу үшін ынтымақтастық" бағыты аясында Әбіш Кекілбаев атындағы Маңғыстау облыстық тарихи-өлкетану музейінің қызметкерлері әл-Фараби атындағы ҚазҰУ-дың Тарих факультеті, Археология, этнология және музеология кафедрасында ғылыми тағылымдама және ғылыми біліктіліктен өтіп жатыр. Тағылымдама барысында Принтмедиа технологиялар колледжінде Т. Жүргенов атындағы Қазақ Ұлттық Өнер академиясының аға оқытушысы, кәсіби фотограф және фототілші Оңғарбек Алхаров "Тарихи-мәдени мұра ескерткіштерін, экспонаттарды фотофиксация жасау, музейлік фотоқор қалыптастыру, музейлік фотолаборатория құру әдістемесі" тақырыбында дәріс оқыды.

Дәріс барысында Оңғарбек Алхаров музейлік экспонаттарды дұрыс фотосуретке түсірудің әдістерін, олардың тарихи мәнін ашып көрсету үшін арнайы құралдарды қолданудың маңыздылығын түсіндірді. Ол тарихи-мәдени мұраны фотофиксациялаудың заманауи тәсілдерін, жарық пен көлеңке комбинациясын, композицияны сақтау әдістерін баяндады. Сонымен қатар, фотосуреттерді архивтеу және музейлік фотоқорды жүйелеу, оларды ғылыми-зерттеу жұмыстарында пайдалану жолдары талқыланды. Музей қызметкерлері музейлік фотолаборатория құрудағы қажетті құрал-жабдықтарды таңдау және фотолаборатория жұмысын ұйымдастыру бойынша кеңестер алды.

Бұл дәріс музей қызметкерлерінің тарихи жәдігерлерді фотосуретке түсіру дағдыларын жетілдіруге, оларды сапалы түрде сақтап қалуға, зерттеу және насихаттау жұмыстарында қолдануға бағытталған жаңа білімдермен қамтамасыз етті.