Дәстүрлі наным-сенімдер туралы кітаптар таныстырылды

Әл-Фараби атындағы ҚазҰУ-да белгілі археолог, этнограф ғалым Төлеубаев Әбдеш Тәшкенұлының «Қазақтардың дәстүрлі наным-сенімдері мен ырымдық әдет-ғұрыптары (салт-жоралғылары)» және «Традиционные верования и суеверные обряды казахов»  атты кітаптарының  тұсаукесер рәсімі өтті.

Шараға тарих факультетінің деканы Досбол Байғонақов, «Парасат» қызметкерлер кәсіподағының төрағасы Талғат Мекебаев, тарих ғылымының докторы, профессор Мадияр Елеуов, тарих ғылымының докторы, профессор Аманжол Қалыш, Әбдеш Төлеубаевтың туыстары, әріптестері мен шәкірттері, белгілі тарихшылар, ғалымдар, оқытушылар мен студенттер  қатысты.

Жиынды тарих факультетінің деканы Досбол Байғонақов ашып, профессор Әбдеш Тәшкенұлының өмірі мен ғылыми еңбек жолына тоқталды. «Әбдеш Төлеубаев 1953 жылы 15 қарашада дүниеге келген. 1970 жылы ҚазМУ-дың тарих факультетіне оқуға түсіп, үздік бітірген. Әбдеш Тәшкенұлы университетімізде 1979 жылдан өмірінің соңына дейін еңбек етті. Ізбасар шәкірттер тәрбиелеп, Археология және этнология  кафедрасының меңгерушісі болды. Көптеген ғылым кандидаттары мен ғылым докторларын дайындады», – деді декан.     

Жарық көрген кітапта қазақтың ежелгі наным-сенімдері, ырымдар, әдет-ғұрыптар  туралы  жазылған. Ғалым Әбдеш Тәшкенұлының осы тақырыптар бойынша ғылыми еңбектері мен мақалалары енгізілген.

Іс-шарада Талғат Мекебаев, Зиябек Қабылдинов, Нұрсан Әлімбай,  Мадияр Елеуов, Аманжол Қалыш және т.б. ғалымдар сөз сөйлеп, Әбдеш Төлеубаев туралы естеліктерімен бөлісіп, ғалымның археология, этнология салаларына сіңірген елеулі еңбегін атап өтті.

Әл-Фараби атындағы ҚазҰУ-дың Баспасөз қызметі