Қырғыз әріптестермен байланыс арта түсті

Әл-Фараби атындағы Қазақ ұлттық университетінің Басқарма Төрағасы – Ректор Жансейіт Түймебаев Жүсіп Баласағұн атындағы Қырғыз ұлттық университетінің ректоры Догдурбек Чонтоев бастаған делегациямен кездесу өткізді.

Делегация құрамында ғылым жөніндегі проректор М.Дылдаев, ф.ғ.д., профессор С.Тіллебаев, шаруашылық бөлімінің бастығы М.Турдубаев, стратегиялық даму бөлімінің меңгерушісі Ж.Жылқышиева, академиялық ұтқырлық және желілік магистратура бөлімінің меңгерушісі С.Шерматова, мемлекеттік және муниципалдық басқару факультетінің деканы К.Базакеева, туризм және экология, география факультетінің деканы Р.Тоқтарова, экономика жоғары мектебінің директоры Н.Мұсаева, цифрлық даму бөлімінің меңгерушісі А.Әбілденов бар.

Кездесу барысында ғылыми-білім беру саласындағы серіктестікті нығайтуға және кеңейтуге бағытталған өзара түсіністік туралы меморандумға қол қойылды. Келісім аясында екі жоғары оқу орны болашақта бірлескен жобаларды іске асыруға ниетті.

Құрметті меймандарды қарсы ала отырып, Жансейіт Түймебаев ҚазҰУ-мен ынтымақтастыққа қызығушылық танытқаны үшін ҚҰУ өкілдеріне алғысын білдірді. Сондай-ақ өз сөзінде ЖОО басшысы қонақтарға ҚазҰУ-дың Бішкектегі филиалының қызметі туралы айтып берді.

«2022 жылы 22 мамыр күні Қазақстан Республикасының Президенті Қасым-Жомарт Тоқаев пен Қырғыз Республикасының Президенті Садыр Жапаровтың қатысуымен ҚазҰУ-дың Бішкектегі филиалы ресми түрде ашылды. Бүгінде филиалда 31 студент оқиды, оның ішінде «Құқықтану» мамандығы бойынша – 21; «Ақпараттық технологиялар» мамандығы бойынша – 7; «Биологиялық және сабақтас ғылымдар» (Биомедицина) мамандығы бойынша – 3. Оқу процесі орыс және ағылшын тілдерінде жүзеге асырылады. Оқу аяқталғаннан кейін түлектерге Әл-Фараби атындағы ҚазҰУ-дың дипломы беріледі», – деді Жансейіт Түймебаев.

Өз кезегінде Ж.Баласағұн атындағы ҚҰУ ректоры Догдурбек Чонтоев екі жетекші жоғары оқу орындары арасындағы байланысты тереңдетудің маңыздылығын атап өтті.

Келіссөз нәтижесінде тараптар екі университеттің ортақ мүдделері үшін табысты ынтымақтастықты жалғастыруға сенім білдірді.

Әл-Фараби атындағы ҚазҰУ-дың Баспасөз қызметі