Ғылым келешегі және жасанды интеллект

Фараби кітапханасында NVIDIA Corporation және жасанды интеллект саласындағы жетекші сарапшылардың қолдауымен ҚазҰУ-дың Жасанды интеллект және Big Data кафедрасы ұйымдастырған Artificial Intelligence fast (AL Farabi Fest) фестивалі өтті.

Іс-шара медицина, компьютерлік ойындар, білім беру және шығармашылық сынды салаларда озық технологияларды және олардың нақты қолданылуын зерттеуге арналған бірегей алаңға айналды.

AI Farabi Fest жасанды интеллект технологияларын насихаттауға, олардың мүмкіндіктері мен практикалық қолданылуын көрсетуге бағытталған. Бұл қатысушыларды нақты мәселелерді шешуде жасанды интеллектіні қолдануға ынталандыру.

Іс-шараға NVIDIA компаниясының және басқа да сала көшбасшыларының сарапшылары, ғалымдар мен оқытушылар және студенттер қатысты.

NVIDIA корпорациясының өнім маркетингінің аға техникалық менеджері Олег Шкода графика, жасанды интеллект және аппараттық жеделдету инновациялары арқылы жаңа деңгейдегі өнімділікті қамтамасыз ете отырып, оқу, ойын және шығармашылық тәсілдерін белсенді түрде өзгертетін GeForce RTX технологияларымен таныстырды.

HYPERPC Kazakhstan компаниясының басқарушы директоры Александр Ерохин ойын технологиялары мен жасанды интеллектінің болашағы туралы айтып берді. Графика, есептеу қуаты және AI саласындағы инновациялардың өзара әрекеттесуі мазмұнның жаңа түрлерін жасауға ғана емес, сонымен қатар пайдаланушылардың технологияны қабылдау тәсілін өзгертуге мүмкіндік береді.

3MIS LLP компаниясының техникалық директоры Нұржан Балтабай пациенттердің денсаулығын диагностикалауды, емдеуді және мониторингті жетілдіруге бағытталған цифрлық медициналық жүйелерге баса назар аударды. Баяндамадан соң спикерлер студенттердің сұрақтарына жауап беріп, үздік сұрақтар үшін студенттерге fitcoins берілді.

Фестиваль аясында AI CTF турнирі өтті. Оған қызығушылық танытқан 196 адам қатысты. Сондай-ақ студенттерге AI-ге қатысты тапсырмалар бойынша өз дағдыларын тексеруге мүмкіндік беретін әртүрлі кескін мен аудионы танудан бастап, нейрондық желілер жасаған шахмат мәселелерін шешуге арналған интерактивті AI Contests байқаулары өтті.

Спикерлермен бірге AI CTF турнирі және AI Contests байқауына белсенді қатысқаны үшін студенттерге жүлде иелене алатын fitcoins табысталды. Сыйлықтардың қатарында жемпір, сөмкелер, термоыдыс, және фестивальдің қолтаңбасы бар стикерлер бар. 

AI Farabi Fest 2024 фестивалі Қазақстанда ЖИ технологияларын ілгерілетудегі маңызды қадам болды. Ұйымдастырушылар барлық қатысушылар мен демеушілерге алғыс білдіріп, жиналғандарды жаңа ауқымды бастамаларға шақырды.

Әл-Фараби атындағы ҚазҰУ-дың Баспасөз қызметі