Әл-Фараби атындағы Қазақ ұлттық университетінің Басқарма Төрағасы – Ректор Жансейіт Түймебаев Қазақстандағы дипломатиялық миссиясының аяқталуына орай, Иран Ислам Республикасының Алматы қаласындағы бас консулы Мохсен Фаганимен кездесті.
ҚазҰУ басшысы консулға екі ел арасындағы әріптестік байланысты нығайтудағы күш-жігері үшін алғыс білдіріп, жоғары білім мен ғылым саласындағы ынтымақтастықты арттырғанына тоқталды.
«Бүгінде Әл-Фараби атындағы Қазақ ұлттық университетінде сіздің тікелей қолдауыңызбен ашылған Арабтану және ирантану орталығы табысты жұмыс істеуде. Сіздің арқаңызда университет студенттері Иран мен ислам әлемінің тарихы мен мәдениетін зерттеп жатыр. Иранның Алматы қаласындағы бас консулы болған уақытыңызда біз табысты жұмыс істедік және жақсы уағдаластықтарға қол жеткіздік», – деді Жансейіт Түймебаев.
Өз кезегінде Мохсен Фагани ректорға ілтипат білдіргені үшін ризашылығын жеткізді. Консул ҚазҰУ-дағы Арабтану және ирантану орталығының жұмысы одан әрі дамитынына сенім білдірді.
«Арабтану және ирантану орталығында жастардың ислам мемлекеттерінің тілі мен мәдениетін үйреніп жатқаны мені қуантады. Сіздің басшылығыңызбен бұл бағыт одан әрі жанданатынына сенімдімін. Сондай-ақ ҚазҰУ оқытушысы біздің елімізде дәстүрлі түрде өтетін халықаралық конкурста жеңіске жеткенін хабарлағым келеді. Келесі аптада ғалым өз сыйлығын Иран президентінің қолынан алады. Құттықтаймын!» – деп қорытындылады бас консул.
Кездесу соңында ҚазҰУ ректоры консулдың Қазақстан мен Иран арасындағы қарым-қатынастың дамуына қосқан зор үлесін атап өтіп, Мохсен Фаганиге «Әл-Фараби» медалін табыс етті.
Әл-Фараби атындағы ҚазҰУ-дың Баспасөз қызметі
Басқа жаңалықтар
