«Менің жылдарым – менің байлығым» атты ұзақ өмір сүру балы өтті

Әл-Фараби атындағы Қазақ ұлттық университетінде «Менің жылдарым – менің байлығым» атты ұзақ өмір сүру балы өтті

2024 жылғы 25 желтоқсан күні Әл-Фараби атындағы Қазақ ұлттық университетінің Біліктілікті арттыру және қосымша білім беру институты мен Алматы қаласы «Белсенді ұзақ өмір сүру орталығы» арасындағы ынтымақтастық туралы меморандум аясында «Күміс университеті» жобасы шеңберінде «Менің жылдарым – менің байлығым» атты ұзақ өмір сүру балы ұйымдастырылды. Іс-шара университеттің Әл-Фараби кітапханасының 4-қабатындағы холлында өтті.

Іс-шараның мақсаты:

Бұл ерекше шара ұзақ өмір сүру философиясын насихаттау, белсенді өмір салтын қолдау және қоғамда өмірлік тәжірибемен бөлісу мәдениетін дамытуға бағытталған. Бал аясында ұрпақтар арасындағы байланыс нығайып, үлкендер өз өмірлік тәжірибелерін жастарға жеткізудің бірегей алаңына айналды.

Әл-Фараби атындағы Қазақ ұлттық университеті тек білім беру ордасы ғана емес, сонымен қатар қоғамның мәдени және әлеуметтік дамуының қозғаушы күші болып табылады. Университет қабырғасында мұндай іс-шаралардың ұйымдастырылуы ұрпақтар арасындағы сабақтастықты қамтамасыз етуге, әлеуметтік өзара әрекеттестікті нығайтуға мүмкіндік береді.

Бағдарлама туралы:

Балға қатысушылар үшін концерттік қойылымдар, интерактивті шеберлік сабақтары және арнайы дефилелер ұйымдастырылды. Іс-шара барысында шығармашылық ұжымдардың өнері қатысушыларға ерекше әсер қалдырды, ал қонақтар заманауи және дәстүрлі би композицияларының үйлесімін тамашалады.

Бұл кеш – өмірдің барлық кезеңдерін бағалай білудің, белсенділік пен шабыттың өмірлік маңыздылығын көрсетудің тағы бір жарқын мысалы болды.