ҚазҰУ оқытушылары мен қызметкерлері мемлекеттік наградамен марапатталды

28 желтоқсан, 2024

Әл-Фараби атындағы ҚазҰУ-дың 90 жылдық мерейтойына арналған салтанатты рәсімде Қазақстан Республикасы Президентінің Жарлығымен елдің әлеуметтік-экономикалық дамуына және ғылыми қызметіне елеулі үлес қосқан профессорлар, оқытушылар мен университет қызметкерлері марапатталды. Марапаттарды ҚР Мемлекеттік Кеңесшісі Ерлан Қарин табыстады.

І дәрежелі «Барыс» орденімен Әл-Фараби атындағы ҚазҰУ-дың Басқарма Төрағасы – Ректоры Жансейіт Түймебаев марапатталды. Осы санатта II дәрежелі «Барыс» орденімен филология ғылымдарының докторы, профессор Эльеонора Сүлейменованың көрнекті жұмысы атап өтілді.

«Парасат» орденімен тарих ғылымдарының докторы Мадияр Елеуов пен биология ғылымдарының докторы Сабир Нұртазин марапатталды. Бұл награда мемлекеттік және қоғамдық қызметкерлерге, сондай-ақ ғалым және мәдениет қайраткерлеріне, адам құқықтары мен әлеуметтік мүдделерді қорғау жөніндегі белсенді қызметі үшін, сондай-ақ республиканың рухани және зияткерлік әлеуетін дамытуға қосқан жеке үлесі үшін беріледі.

Экономика, әлеуметтік сала, ғылым және мәдениетті дамытудағы еңбегі үшін «Құрмет» орденімен: биология ғылымдарының докторы Сұлтан Төлеуханов, экономика ғылымдарының кандидаты Мәди Байдәулетов, филология ғылымдарының докторы Баян Жолдасбекова, физика-техникалық ғылымдарының докторы Салтанат Бөлегенова, химия ғылымдарының кандидаты Алина Галеева марапатталды.

«Қазақстанның еңбек сіңірген қайраткері» құрметті атағы Ақпарат және коммуникация департаментінің директоры, ҚазҰУ-дың Баспасөз хатшысы Қаншайым Байдәулетке республика алдындағы ерекше еңбегі үшін берілді.

Мемлекеттік Кеңесші Ерлан Қарин сондай-ақ коммерцияландыру жөніндегі кеңсе басшысы Алмас Гаухарға, Дәрілік өсімдіктерді ғылыми-зерттеу орталығының директоры Жанар Жеңіске, физика-математика ғылымдарының кандидаты Мадина Мансуроваға, география ғылымдарының кандидаты Алия Ақтымбаеваға, заң ғылымдарының кандидаты Қарлығаш Үсеиноваға «Ерен еңбегі үшін» медалін табыс етті.