Әл-Фараби атындағы ҚазҰУ магистранттары Шыңжаң туризм академиясында ғылыми тағылымдамадан өтуде

Әл-Фараби атындағы Қазақ ұлттық университетінің Рекреациялық география және туризм кафедрасының 2-курс магистранттары ғылыми тәжірибе аясында Шыңжаң экология және география институтына қарасты Шыңжаң туризм академиясында (Үрімжі қ., ҚХР) ғылыми тағылымдамадан өтуде.

Тағылымдама шетелдік жоғары оқу орындарында ғылыми тәжірибеден өтуді көздейді. Оның мақсаты – магистранттардың кәсіби білімдерін жетілдіру, ғылыми-зерттеу қабілеттерін дамыту және олардың диссертациялары аясында ғылыми мақалалар әзірлеу.

Тағылымдама барысында магистранттар туризмді дамыту мен экологиялық менеджменттің заманауи тәсілдерін зерделеп, жетекші ғалымдардың дәрістеріне қатысып, практикалық семинарларда тәжірибе жинауда. Ерекше назар тұрақты туризмді дамытуға, рекреациялық қызметтің экологиялық аспектілеріне және олардың Қазақстан жағдайында қолданылуына аударылады.

Мұндай халықаралық бағдарламалар болашақ мамандарға құнды тәжірибе жинақтап, ғылыми көкжиегін кеңейтуге және шетелдік әріптестермен кәсіби байланыс орнатуға мүмкіндік береді. Бұл Қазақстандағы туризм және рекреация саласының одан әрі дамуына ықпал етеді.

Тағылымдама туризм және рекреация саласындағы қазіргі заманғы сын-қатерлерді шеше алатын білікті кадрларды даярлауда маңызды кезең болмақ.