ҚазҰУ түлегі Оксфордқа шақырту алды

Әл-Фараби атындағы ҚазҰУ шығыстану факультеті Қытайтану кафедрасының түлегі, жас ғалым Арыстанбек Ақылбай Оксфорд университетіне (Ұлыбритания) қабылданды.

Дарынды жас ғалым бұған дейін Гарвардта (АҚШ) келісімшарт бойынша шақырылған ғылыми қызметкер ретінде табысты жұмыс істеген.

Арыстанбек Ақылбайдың ғылыми жолы Әл-Фараби атындағы ҚазҰУ-дың шығыстану факультетінде басталды. Ол №40 мектеп-гимназияны «Алтын белгімен» бітіргеннен кейін ҚазҰУ-ға оқуға түсті. Қытай тілін меңгерген А.Ақылбай Шанхай халықаралық зерттеулер университетіне Қытай үкіметінің толық грантына түсті. Шанхайда оқу кезінде ол Қытайды ғана емес, сонымен қатар Азия-Тынық мұхиты аймағы елдерін зерттеді. Сондай-ақ Оңтүстік Корея, Малайзия, Сингапурда өткен іс-шараларға, конференцияларға қатысты.     

Ағылшын тілінде магистрлік диссертациясын сәтті қорғап, жас ғалым елге оралды. Конкурстық негізде Астана қаласындағы Қоғамдық даму министрлігіне жұмысқа орналасты, халықаралық ынтымақтастық жөніндегі сарапшы, кейін Ақпарат және қоғамдық даму министрлігінің Жастар және отбасы істері комитетінің жастар саясатын үйлестіру басқармасының сарапшысы болды.

Жас ғалым ҚазҰУ-дағы оқытушылық қызметінде мол тәжірибе жинақтап, Қытайдың тарихы мен сыртқы саясатынан бастап, Азия елдерінің жаһандық өңірлік процестеріне арналған пәндерді жүргізді. Шығыстану факультетінің докторантурасына түсу арқылы Арыстанбек Гарвард университетіне жолдаманы жеңіп алды, онда ол «Сингапур мемлекеттілігінің қалыптасу эволюциясы: меритократия және модернизация (Қазақстан үшін тәжірибе)» тақырыбында зерттеулер жүргізді.

Бүгінде Арыстанбек Оксфорд университетіне оқуға қабылданды. Ол Ұлыбританияның әйгілі Оксфордтың жаһандық және аймақтық зерттеулер мектебінде «Аймақтану» мамандығы бойынша оқуды бастайды. Оқуды аяқтағаннан кейін Арыстанбек Оксфорд университетінің қауымдастырылған түлегі мәртебесін алады.

Әл-Фараби атындағы ҚазҰУ-дың Баспасөз қызметі