ҚазҰУ Биркбек университетімен байланыс орнатты

Әл-Фараби атындағы Қазақ ұлттық университетінің Басқарма Төрағасы – Ректор Жансейіт Түймебаев Ұлыбританияда өтіп жатқан BETT 2025 халықаралық көрмесі аясында Биркбек университетінің вице-канцлері, профессор Салли Уилермен кездесті.

Жүздесу барысында тараптар серіктестікті арттыру жолдарын талқылап, бірқатар мәселелерді ортаға салды. Сондай-ақ қос университет басшылығы ынтымақтастық туралы меморандумға қол қойды.

Келіссөз нәтижесі бойынша ҚазҰУ Биркбек университетімен академиялық ұтқырлық бағдарламасы бойынша оқытушылар мен студенттер алмасу, ортақ ғылыми жобаларды жүзеге асыру, ғалымдарды тағылымдамадан өткізу бойынша бірлескен жұмысты іске асырады.

ЖОО басшысы Жансейіт Түймебаев Салли Уилерге ҚазҰУ-дың ғылыми әлеуетін таныстырып, оқу ордасының жетістіктеріне тоқталды. Өз сөзінде ректор алдағы уақытта қосдипломдық білім беру бағдарламасын іске қосуды және студенттер үшін арнайы көрме мен фестиваль өткізуді ұсынды. 

Өз кезегінде Салли Уилер білім ордасына жасаған сапары үшін Жансейіт Түймебаевқа алғысын жеткізді. Вице-канцлер айтылған барлық ұсыныстарды қолдайтынын жеткізіп, екі университет арасындағы әріптестік байланыс алдағы уақытта да дамып, беки түсетініне сенім білдірді.

Кездесу соңында қос тарап аталған бастамаларды жоспарлы түрде іске асыруға уағдаласты.

Әл-Фараби атындағы ҚазҰУ-дың Баспасөз қызметі