"Баршаңызды келе жатқан жаңа 2016 жылмен шын жүректен құттықтаймын!" - ҚазҰУ ректоры Ғ.Мұтанов

Құрметті әріптестер мен студенттер!

Баршаңызды келе жатқан жаңа 2016 жылмен шын жүректен құттықтаймын!

Тарих еншісіне айналғалы отырған 2015 жыл өзінің сәттіліктерін сыйлап өтіп барады. Бұл жыл ҚазҰУ ұжымы үшін айтулы белестер мен жетістіктерге толы болды. Олардың ішінде әл-Фараби атындағы ҚазҰУ-дың QS рейтингтік агенттігі қорытындысы бойынша 275-орынды бағындырып, халықаралық деңгейдегі өз мәртебесін дәлелдей түскенін ерекше атап өткім келеді.

Ғылым мен білім, мәдениет пен спорт саласында университет толайым табыстарға қол жеткізді. Нәтижеге бағытталған рейтингтік жүйе бүгінде өз жемісін беруде. Өтіп бара жатқан жылда бұған дейінгі көрсеткіштеріміздің еселенгенін байқаймыз. Жуырда Қазақ хандығының 550 жылдығына орай Бакуде өткен халықаралық конференцияда табысталған Гейдар Алиев атындағы алтын медальді барша ҚазҰУ ұжымына берілген жоғары баға деп білемін. Бүгінде Қазақстан Туын халықаралық аренада желбіретіп, ел намысын асқақтатқан талай спорт саңлақтарын тәрбиелеген ҚазҰУ – Қазақстанның студенттік спортында талассыз көшбасшы.

Осы орайда келер жылдан да зор үміт күтеміз. Өзінің даму бағытын айқындаған университет ұлттық зерттеу университетіне айналу жолында белсенді жұмыс атқаруда. ҚазҰУ оқытушылары мен студенттері Елбасы бастамаларына қолдау білдіріп, алға қойған міндеттерді жүзеге асыруда аянбай еңбек етіп келеді.

Қадірменді ҚазҰУ ұжымы! Жаңа жылда баршаңызға шығармашылық табыс, қажымас қайрат, сарқылмас жігер тілеймін! Еліміз тыныш болып, әр шаңырақта қуаныш, шаттық көбейе берсін! Мешін жылы бәріміз үшін табысты болғай!

Ізгі ниетпен, әл-Фараби атындағы ҚазҰУ ректоры Ғалым МҰТАНОВ