ҚазҰУ Наурыз мейрамын атап өтті
Әл-Фараби атындағы ҚазҰУ Бостандық ауданының Тұңғыш Президент саябағында өткен Наурыз мейрамына қатысты.
Мерекеге Әл-Фараби атындағы Қазақ ұлттық университетінің Басқарма Төрағасы – Ректор Жансейіт Түймебаев, профессорлар, ғалымдар, оқытушылар, студенттер, шетелдік қонақтар және Бостандық ауданының тұрғындары қатысты. Университет ректоры барлық қонақтар мен қатысушыларды Ұлыстың ұлы күні – Наурыз мерекесімен құттықтап, Бостандық ауданы Алматы қаласының жүрегі болып табылатынын және елдің іскерлік-мәдени орталығы ретінде ерекше орын алатынын атап өтті. Ол – Алматының оңтүстік-шығысында орналасқан және қаланың ең ірі орталық аудандарының бірі, онда тұратын халық саны – 335 456. Ауданда 63 білім беру ұйымы, оның ішінде 34 мемлекеттік және 29 жекеменшік жалпы білім беретін мектеп жұмыс істейді. Сонымен қатар 11 жоғары оқу орны және 16 орта арнаулы оқу орны бар, онда 88 483 студент оқиды. Олардың ішінде ең ірі жоғары оқу орны – Әл-Фараби атындағы ҚазҰУ. Университет өзінің 90 жылдық тарихында қазақ білімі мен ғылымының дамуына баға жетпес үлес қосты және еліміздің жоғары білімі мен ғылымының бәсекеге қабілеттілігін қамтамасыз ету үшін бар күшін салуда.
Қазіргі уақытта университетте 5000-нан астам профессор-оқытушы мен қызметкерлер жұмыс істейді, ал білім алып жатқан жастар саны 29 мыңға жуық. Іс-шараның ресми бөлімінен кейін университеттің талантты студенттері дайындаған концерт өтті. Көрермендер қазақ мәдениеті мен дәстүрлерінің байлығын бейнелейтін музыкалық нөмірлерді, би қойылымдарын және театрландырылған қойылымдарды тамашалады. Наурыз мейрамы тек көктем мерекесі ғана емес, сонымен қатар барлық ұлттар мен ұлыстар арасындағы бейбітшілік пен рухани байланысты нығайтатын, сондай-ақ мәдени дәстүрлермен алмасуға ықпал ететін маңызды оқиға болды. Мереке соңында барлық қатысушылар дәстүрлі ұлттық тағамдардан дәм татты.
Әл-Фараби атындағы ҚазҰУ-дың Баспасөз қызметі
