ТДМ-4: Оқу ордамызда «Сұңқар» студенттер мен магистранттар кәсіптік бюросының ұйымдастыруымен мастер класс өтті

Әл-Фараби атындағы Қазақ ұлттық университетінің Филология факультеті «Сұңқар» студенттер мен магистранттар кәсіптік бюросының ұйымдастыруымен 20 наурыз күні мастер класс өтті. Кәсіби тәжірибесі мол контентмейкер, мобилограф, спикер Бердіш Дидар Тоғайқызы студенттермен кездесіп, өз білімімен және тәжірибесімен бөлісті. Бұл шара жастардың шығармашылық әлеуетін арттыруға, цифрлық мүмкіндіктерді тиімді пайдалануға бағытталған маңызды жиын болды. 

Дидар ханым мастер класс барысында қазіргі заманғы контент жасаудың қыр-сырына тоқталып, мобилографияның негізгі қағидаларын түсіндірді. Ол сапалы фото мен видео түсіру әдістерін, әлеуметтік желіге арналған мазмұнды материалдар дайындау тәсілдерін көрсетті.

Кездесуге қатысқан студенттер теориялық біліммен қатар, практикалық тапсырмаларды орындап, өз қабілеттерін сынап көрді. Олар заманауи технологияларды қолдану арқылы сапалы контент жасаудың маңыздылығын түсініп, мобилография саласындағы жаңа дағдыларды меңгеруге мүмкіндік алды. Дидар Тоғайқызы қатысушылардың сұрақтарына жауап беріп, шығармашылық дамуға қатысты бағыт-бағдар берді. 

Ұйымдастырушылар тарапынан шақыртуымызға келген Дидар ханымға өз тәжірибесімен бөлісіп, студенттердің кәсіби біліктілігін арттыруға қосқан үлесі үшін алғыс білдіреді. Сондай-ақ, өзін дамытуға ұмтылған, жаңа білім алуға құлшынған студенттерге де өз алғысымызды жеткіземіз. Осындай пайдалы кездесулер алдағы уақытта да жалғасын тауып, жас мамандардың шығармашылық қабілеттерін шыңдауға серпін береді деп сенеміз.